اشعار حبیب ساهر 7

ساری گۆللر آچیلان واخت، گۆنش پارلامادان،

داغ یولوندان بیری آهسته گلردی مئشه یه،
ساری بیر قیز! ساری گۆلدن داها رنگین، دیلبر،
تشنه بیر قوش کیمی نازیله گیرردی دره یه...
***
گؤرمۆسن می سولار اۆسته نئجه بیر گۆل بوداغی،
ساللانیرکن داغیدار سایه ی ناز؟
گؤرمۆسن می سحرین پرده ی عشقینده دوغان،
ساری بیر گۆن نئجه گۆللرله ائدر راز و نیاز؟
**
ساریشین قیز، ساری گۆلدن داها رنگین، رعنا
داغیداردی سویا گۆل رنگلی گیسولرینی...
قصۀ شوقونو سؤیلرکن، همن عاشیقینه،
پاک ائدردی او تۆتن گۆل یاناغیندان ترینی...
***
بیر سحر آچمادی آرتیق ساری گۆللر باغدا،
داغ یولوندان مئشه یه گلمه دی جانان، یالنیز،
کؤلگه‌لر تک داغی گزدیم، دره‌لرده اریدیم،
گؤرمه دیم یاریما بنزر، اوبا دا بیر ساری قیز...

اشعار حبیب ساهر 6

بیزیم توركو شیرین دیل دیر
آنا گولدور٬ بیر گون سولار
آنا دیلى شیرین اولار
بیزیم توركو شیرین دیلدیر    
خوش صدالى٬ زنگین دیلدیر
دیل گونشدیر٬ ایشیق ساچار
آزادلیغا قاپى آچار
یادین دیلى بویوندوروق
بیر گئچیددیر بوروق بوروق
بویوندوروق خالقى بوغار
گئچیدلرده قولدور سویار
قوى یادلاشسین سئناتورلار
خالقى سویان تاجیر٬ توججار
یالتاق شاعیر یولون آزسین
تكجه فارسى غزل یازسین!

اشعار حبیب ساهر 5

سارماشیقلار تیتررکن سرین سولار باشیندا،
تک – تک دۆشر اونلارین سارالمیش یاپراقلاری.
هله مئشه یاشیل کن، هله هاوا ایلیق کن،
داغلار باشین قار آلار، چؤللر اولور ساپ- ساری
***
هله آخشام اولمادان، گۆنش داغدا سؤنمه دن،
مؤوسیمین بوز کؤلگه‌سی، دره‌لر ایچره اَنر
یاشیل ایپک گئییملی” آری اوتان” قوشلارین،
هر گۆنکۆ شن سسلری، یای گئچمه دن غمله نر!
***
آخار سولار دورولور، کؤلگه‌لرده اوزانیر،
ایلیق گۆنده یوللاردان گئچن یورغون یولجولار،
بولاقلارین باشیندا دۆشۆنجه‌لی اوتوروب،
کؤلگه‌له نن باغلارا، اوزاقلاردان باخارلار...

اشعار حبیب ساهر 4

بولود آردی شیمشك چاخار،
اریر قارلار، سولار آخار،
داغ آردیندان گۆنش گۆلر،
اولار باهار، اولار باهار ...
***
گۆن ساچلارین سویا تؤكر،
اؤزون گؤروب، سودا گۆلر!
گؤیدن ائنیب، اینسانلارا
او دۆنیادان خبر وئرر ...
***
آی قیزیل گۆن، قیرمیزی گۆن
داغلار آرا، نه‌لر گؤردۆن؟
درین ـ درین کؤلگه ده سن
نه‌لر گؤردۆن، آی قیزیل گۆن؟

اشعار حبیب ساهر 3

ساری گۆللر آچیلان واخت، گۆنش پارلامادان،
داغ یولوندان بیری آهسته گلردی مئشه یه،
ساری بیر قیز! ساری گۆلدن داها رنگین، دیلبر،
تشنه بیر قوش کیمی نازیله گیرردی دره یه...
***
گؤرمۆسن می سولار اۆسته نئجه بیر گۆل بوداغی،
ساللانیرکن داغیدار سایه ی ناز؟
گؤرمۆسن می سحرین پرده ی عشقینده دوغان،
ساری بیر گۆن نئجه گۆللرله ائدر راز و نیاز؟
***
ساریشین قیز، ساری گۆلدن داها رنگین، رعنا
داغیداردی سویا گۆل رنگلی گیسولرینی...
قصۀ شوقونو سؤیلرکن، همن عاشیقینه،
پاک ائدردی او تۆتن گۆل یاناغیندان ترینی...
***
بیر سحر آچمادی آرتیق ساری گۆللر باغدا،
داغ یولوندان مئشه یه گلمه دی جانان، یالنیز،
کؤلگه‌لر تک داغی گزدیم، دره‌لرده اریدیم،
گؤرمه دیم یاریما بنزر، اوبا دا بیر ساری قیز...

اشعار حبیب ساهر 2

باغلادیم پنجره‌نی، گئجه‌نین ایشیقلاری
بوغولدو بیر آن ایچره، قارانلیق اوتاغیمدا؛
تؤكۆلدۆ كهكشانین، یولوما صدفلری،
سارالدی آرزولارین، گۆللری بوداغیمدا ...
***
یۆزلرجه‌  بؤجكلرین، تیتره‌ ین اینجه سسی،
اریدی تارلالارین، رمزناک ‌ ظۆلمتینده.
كسیلدی یئلین سسی، سولارین زمزمه‌سی،
اوجالدی باشقا سسلر، مئشه‌نین خلوتینده
***
باغلاسام پنجره‌نی، گئجه‌نین ایشیغینا،
گؤنۆلده یانان آتش، بلكه ده سؤنمه یه جك!
منی بو قارانلیقدا، آختاران اۆمید پئیكی،
شفقلی آرزولارین یولوندان دؤنمه یه جك.
***
اولدوزلو گئجه‌لرین، رنگلری سولانا دَك
قوی گؤنۆل قارانلیقدا، دینله‌سین اؤز نفسین
یئتر بو كور دۆنیانین، فوسونكار ترانه‌سی
قوی ‌بیر آز ائشیدیم من، باشقا عالملر سسین ...

اشعار حبیب ساهر 1

کهرۆبادن آچیق عاج رنگینه ماییل مرمر،
و او مرمردن اولان هئیکلی تصویر ائدینیز...
ایستی بیر گۆنده، دنیزده یویونارکن گؤردۆم،
عاشیق اولدوم اونا، یادیندا می، آی ماوی دنیز؟
***
ساده بیر حس دئگییلدی، سو قیزییدی او گؤزل،
یا سولاردا آچیلان هاله‌لی نیلوفر ایدی...
لاجورد پرده ده افسانَوی بیر طوریله او
گۆلدۆ بیر آز منه، قارشیمدا گۆلرکن اریدی!
***
اَریدی، کؤلگه نئجه گؤلده اَریر، حلقه‌له نیر،
اَریدی حلقه‌لنن موجدا نایاب اولدو...
لاجورد پرده ده اول نقشِ دل انگیزِ خیال،
صبح عؤمرۆمده آچان سئحیرلی بیر خواب اولدو...