ساری گۆللر آچیلان واخت، گۆنش پارلامادان،

داغ یولوندان بیری آهسته گلردی مئشه یه،
ساری بیر قیز! ساری گۆلدن داها رنگین، دیلبر،
تشنه بیر قوش کیمی نازیله گیرردی دره یه...
***
گؤرمۆسن می سولار اۆسته نئجه بیر گۆل بوداغی،
ساللانیرکن داغیدار سایه ی ناز؟
گؤرمۆسن می سحرین پرده ی عشقینده دوغان،
ساری بیر گۆن نئجه گۆللرله ائدر راز و نیاز؟
**
ساریشین قیز، ساری گۆلدن داها رنگین، رعنا
داغیداردی سویا گۆل رنگلی گیسولرینی...
قصۀ شوقونو سؤیلرکن، همن عاشیقینه،
پاک ائدردی او تۆتن گۆل یاناغیندان ترینی...
***
بیر سحر آچمادی آرتیق ساری گۆللر باغدا،
داغ یولوندان مئشه یه گلمه دی جانان، یالنیز،
کؤلگه‌لر تک داغی گزدیم، دره‌لرده اریدیم،
گؤرمه دیم یاریما بنزر، اوبا دا بیر ساری قیز...