اشعار علی اقا واحد 8

سئوگیلیم بیر بیلمه دین سنسیز نه محنت چکمیشم
بـی وجــود اغیـــارلردن چـــوخ اذیّت چکـــمیشم
ذوق وصلین خاطره گلدیکجه غمدن آغلارام
اؤزگه بیر جانانه سانما دیلده حسرت چکمیشم
مه جمالین گؤرمه یه بیگانه فرصت وئرمه دی
صبح اولونجا هر گئجه کویوندا نوبت چکمیشم
بیوفالیق رسمینی ترک ائت دئدیم ترک ائتمه دین
سـندن اوترو یـالواریب اغیـاره منّت چکـــمیشم
وصـل یـار اولمــاز میسّر هـر بلاکش عاشیقه
من صداقتله بو یولدا چوخ مصیبت چکمیشم
نـازنینلر وصــلینه من نـایل اولســام حــقلی یم
چون کی چوخ مهپاره لر عشقینده زحمت چکمیشم
اؤزگه نی دیندیردی اؤز یاریم منی دیندیرمه دی
ایندی گؤر "واحید" خجالتدن نه ذلّت چکمیشم

اشعار علی اقا واحد 7

بولبولون ناله‌ی جـانسوزینه باعث گـول ایمیـش
گوله هم عاشیقِ سـرگشتـه اولان بـولبـول ایمیـش
من دئیردیم کی، او مه مهر و وفـا صـاحیبی‌دیـر
دئمه بس، مهر و وفـادن او اوزی غافیل ایمیـش
داشا تـأثیـر ائلـه‌دی آهیــم اودیـله یـاندی
بیر اثر ائتمه‌دی اول شوخه، نـه آهـن‌دل ایمیـش
پیرِ میخانه سـوزون شیـخ قبول ائیلـه‌دی دون
آدم اولادی‌دیر، حقّا کی، هلـه قـابـل ایمیـش
یوخدور عاشیق، دئدی اول مه، منه سندن غیری
گیزلی منـدن، دئمـه، بیگانه‌لـره مایل ایمیـش!
عشقه دل ویرمز ایدیم، بارِ غمیـن بیلسـه‌ایـدیـم
نه بیلیم، عشقدن عشّاقـه بـلا حـاصیـل ایمیـش؟
واحـدا، مشکـل ایشـه خلقـده صبـر اوسـا اگر
اولو تدریج ایله آسان، هـر ایـش مشکل ایمیـش

اشعار علی اقا واحد 7

عشقین تمام نشئه‌سی دیوانه لیکده‌دیر
میخانه‌نین ملاحتی مستانه لیکده‌دیر
جاهل‌لر ایله عارفین اولماز علاقه‌سی
حال اهلینین تکاملی فرزانه لیکده‌دیر
لعلین خیالی کونلومه دولسا، عجب ده‌گیل
گیزلین خزینه‌نین چوخی ویرانه لیکده‌دیر
یئتمز وفاسی آخره نامرد اولان‌لارین
شخصین بوتون دیانتی مردانه لیکده‌دیر
واحد! اگر چی صنعته قیمت وئریرسه خلق
شعرین ده قدر و قیمتی دردانه لیکده‌دیر

اشعار علی اقا واحد 6

بیر نفر اهل وفا مین بی‌وفادن یاخشیدیر
بیر صداقت اهلی مین اهل ریادن یاخشیدیر
هانسی گول دیر حسنده سندن گوزه‌ل دیر، سئوگیلیم
هانسی بولبول عشقده من بینوادن یاخشیدیر
قاشلارین چرخین هلالیندن، اوزین خورشیددن
صورتین آیینه‌ی گیتی نمادن یاخشیدیر
بیر داها خالین گوزه‌ل‌لیک آرتیریر رخسارینه
بیر غلط سوزدیر دیمشلر، آغ قارادان یاخشیدیر
گوزلرین صحرای چین آهولریندن دل فریب
عنبرین گیسولرین مشک خطادن یاخشیدیر
صحتی بیمار، عشقین کعبه‌ی کوینده‌دیر
اهل درده خاک راهین توتیادن یاخشیدیر
مین بلا طوفانی، قوپسا، ذره گلمه‌ز عینیمه
رخنه گورمز هر بنا کیم ابتدادن یاخشیدیر
جاهله تبلیغ عرفان ایله‌ملک آسان ده‌گیل
دیده‌ی خفاش ایچون ظلمت ضیادن یاخشیدیر
واحد،انصافاً دیسین تبریزده دوستوم اعتماد
گنجلرده هانسی شاعر «بی‌ریادن» یاخشیدیر

اشعار علی اقا واحد 5

دیل بیلن سوز آنلایان بیر نازلی یار ایستر کونول
لاله‌دن، گول‌دن گوزه‌ل بیر نوبهار ایستر کونول
اعتبارین گورمه‌ینجه سئومه‌رم بیر دیلبری
نازنین مهپاره‌لردن اعتبار ایستر کونول
هر قارا زولفون اسیری اولمارام بوندان سورا
ایندی عالم اوزگه‌دیر، خوش روزگار ایستر کونول
اوینایوب، گولمه‌ک، دانیشماق، عیش و نوش ایامیدیر
بولبول شیدا کیمی مین لاله‌زار ایستر کونول
هر طرف گول‌دیر، چیچک‌دیر بئیله آزاد ئولکه‌میز
دائم اوز خوشبخت خلقین بختیار ایستیر کونول
بیز سووه‌ت خلقین حقیقتله سئوون عاشق‌لریک
خائنی، ادنانی یوردومدان کنار ایستر کونول!
بختور، واحد، او کس‌لر دیر بو خوش عالمده‌دیر
هر زمان بو شن حیاتی پایدار ایستر کونول!

اشعار علی اقا واحد 4

گول منی سن ایسته سن عومروم هدر اولماز
صلح اولماسا، اولاد وطن بخته ور اولماز
آزاده لیقی، صولحی سئویلر بیزیم ائللر
بیر یئرده کی، صولح اولسا، او یئرده ضرر اولماز
اودلار وطنین نازلی گوزه للر بورویوبدور
ائللرده مثل وارکی، گوزل سیز شهر اولماز
آهیم اودو بلکه ائله سین قلبینه تاثیر
نیسان سویونو ایچمه یه داشدان گهر اولماز
هیجران گئجه سی، من چکنی چکمه سین اغیار
ظننیم جه قیامت گونو بوندان بتر اولماز
زولفون اوزونو توتسادا، گویچک لیگین آرتیر
ظلمت گئجه لر اولماسا آیدین سحر اولماز
واحد سنه، غم چکمه رقابت ائدن اولسا
مین گول قووشا بیر یئره، بحر خزر اولماز

اشعار علی اقا واحد 3

گؤزللر ایچره سن ای ماهپاره بیرد نه سن
گؤزل لرین گؤزو سن، زلفی قاره بیرد نه سن
گؤل اؤزلی نازلی صنم لر دوشر قدم لرینه
بو چشم مست ایله قیلسان اشاره بیرد نه سن
سن اولماسان منی هجران غمی هلاک ائیلرشکسته کونلومه عالمده چاره بیرد نه سن
زمانه اهلینه مشهورسان گؤزل لیکده
بو سر گیزلی دگیل، آشکاره بیرد نه سن
او ذوقی دولت دنیایه وئرمه رم هردم
من فقیره ده قیلسان اشاره بیرد نه سن
گؤزل حیاتینی واحد فنایه صرف ائتمه
سنی زمانه یئتیرمز دوباره بیرد نه سن

اشعار علی اقا واحد 2

ای گول، سنی آخر، بیلیرم اویره دن اولدو
سالدین منی هیجرانه، بو بیلمم، نه دن اولدو؟
دوزدوم نه قده ر زحمته، هر نازینی چکدیم
کونلوم غمی- عشقینله اسیرئ- محن اولدو
سن بویله وفاسیزدا دئییل دین، بیلیرم منظنیمجه، سنی بو ایشه تحریک ائدن اولدو
رسوایئ- جاهان ائیله دین آخر منی، گئتدین
ایندی منه بیگانه گلیب طعنه زن اولدو
بیر واخت پیشیمان اولاجاقسان بو عمل دن
سندن بو ایشین، بلکه حسابین چکه ن اولدو
گزدین، گوزلیم، غیرایله، من دردینی چکدیم
گلدی نه بلا باشیما، بو غصه دن اولدو
واحید او گولون وصلینه بیگانه یئتیشدی
دردین چکه ن عالمده بیر آنجاق حسن اولدو

اشعار علی اقا واحد 1

کؤنلوم یئنه بولبول کیمی شیدایی-وطن دیر،
مجنون ائدن عاشیق لری لئیلایی-وطن دیر.

یوزلرله گؤزل عاشیقی اولسام دا من،امّا
قلبیم یئنه ده عاشیقی- سئودایی- وطن دیر.

دونیایه گؤزللیک وئرن، البتّه، گونش دیر،
اونداندا گؤزل خلقه تجلّایی- وطن دیر.

قویماز بو مقدّس یئره بیگانه توخونسون،
هرکس کی،صداقتلی دیر،ابنایی-وطن دیر.

تعریفی-بهشت ائیلمه سین خلقیمه هئچ کس
جنّت ده، بهشت ده بیزه صحرایی-وطن دیر.

واحید،ائله ظّن ائیله کی،من یوسیفی-عصرم،
معشوقه منه عشقی -زولیخایی- وطن دیر