اشعار صراف تبریزی 10

شرار شمع آهيمدن منيم پروانه لر ياندي
اؤزوم يانديم كول اولدوم سهلدور بيگانه لر ياندي
تجلاي جمال جام غملن بئيله سرگرمم
دوتوب اودياندي جانيم بيلمديم اما نه لر ياندي
يوزوم سويين اوزوم سويندن اوتري سوكيمي توكدوم
خجالتدن سويا دوندي مي و ميخانه لر ياندي
دئيون مجنونه بول بي خانمان اولماخليقين قدرين
شعاع حسن ليلادن سراسر خانه لر ياندي
يانارسان اي كونول گل طره جانانه چنگ اورما
نچون مشاطه لر چنگينده گؤردوم شانه لر ياندي
بلا صحراسي اولجاق مسكنيم بير آه چكديم كيم
دوتوب صحرا لراود صحرانشين ديوانه لر ياندي
بو غم كنجونده سنسيز اي منيم شمع شب افروزيم
پياپي آهيميلن مشعل شاهانه لر ياندي
محبت بوته سينده يانمادي بير نقدي صرافين
بو سوز عشقيلن چوخ عاقل و فرزانه لر ياندي

اشعار صراف تبریزی 9

بو عشقه پرده چكمگه چوخ ائيله ديم تلاش
اورتدوكجه من تؤكولدي گؤزوم ياشي ائتدي فاش
يوخ ساحل نجات، به غير از كنار دوست
اي سيل اشك، ويرسان اگر هانسي باشه داش
فرهاد قويدي جانيني بير بيستونيده
من گونده مين ستون ائدرم سينه ده تداش
اي كاش اوْلميايدي كؤنول پاي بند عشق
يا درد عشقي چكمگه تابيم اوْلايدي كاش
بي آبرو گؤروب مني، گؤز تئز سالوب يوزهعمرينده هر نه خون دل ائتميشدي داش باش
اي چشمه حيات، دئسم سنگدل سنه
اصلا مكدر اوْلما اوْلور چشمه باغري داش
قربان اوْلوم قلم قاشيوه ائتمه، ائتمه گؤز
حيران اوْلوم قرا گؤزوه آتما، آتما قاش
صراف ساخلا توسن طبعون لجاميني

اشعار صراف تبریزی 8

پريشان خاطريم بير طره پر پيچ و تاب ايستر
عجب ديوانه دير اوز قيدينه بند طناب ايستر
گلستان وجوديم شبنم غملن تاپار رونق
نئجه كيم ابر رحمت بارشين اهل عذاب ايستر
خيال وصليله بير لحظه شاد اولدوم خطا قيلديم
او بير درد و غمه ايندي گلوب مندن حساب ايستر
محبت اهلي محنت لذتين راحت بولور جانه
هميشه آرزوي هجر ائدر،ني خور و خواب ايستر
جنون عشق اولان گوندن سوروشماز كيمسه احواليم
بلي ديوانه دن عاقل هميشه اجتناب ايستر
سوساميش قتليمه پيكان غم ايستر ايچه قانيم
سانارسان كيم خمار آلوده دور جام شراب ايستر
اولور بزم محبتده شراب وصليلن سر خوش
او كس كيم سيخ محنتده كؤنول مرغين كباب ايستر
ييخيلميش كؤنلومه رحم ائيله ظاليم ائيلمه ويران
كيم اؤز معموره سين سن بي مروت تك خراب ايستر؟
در اميد اولوب صرافه هر بير سمتدن بسته
علي(ع) تك فاتح خيبر اليلن فتح باب ايستر

اشعار صراف تبریزی 7

مني  سوْداي  زولفون ائيليوب  آشفته  مجنون  تك
آخار سيل سرشكيم هر طرف سرگشته جيحون تك
گداي ملك عشقم ليك اؤز شهريمده سلطانم
تؤكنمز نقد اشكيم ، وار اليمده  گنج  قارون تك
بو فكريلن كؤنول بير بوسه آلسون خاك پايوندان
گلور گؤزدن ، دوشرتوپراقه دائم اشك گلگون تك
گول  رويون  ائدنده  داغ  دلدن  لاله يه  نسبت
دولار كؤنلوم فضاسي داغيلن پيوسته، هامون تك
مني  بير تلخ  گفتاريله  ديندور ، آرزومندم
سنون زهرون گلير شيرين مذاق جانه، معجون تك
كؤنول قانيله دوْلموش بزم غمده كاسه  چشميم
اوْلوب چون جام عيشيم سرنگون بوطاس وارون تك
دئمه پيكان غمزون خون دلدن قانه غرق اوْلدي
درون سينه ده  ياتميش  صدفده درّ مكنون تك
قوپارّام  تيشه  حسرتله  هر بير گونده  مين داغي
مني شيرين لبون شوري ائدوب فرهاد، مجنون تك
نهال درد و غم اوْلسام نوْلور آخر دؤنوب حاليم
اوْلوبدور بار محنتدن  خميده  قامتيم ، نون تك
منم  صراف ، لاكن  نقد  طاعتدن  تهيدستم
دوْلوبدور دامنيم گرد گنه دن، فُلك مشحون تك

اشعار صراف تبریزی 6

اؤز اختياريمي وئرميشم نيگار الينه
يئتوبدو فاعل مختارون اختيار الينه
كؤنول گر ايستيه سن مست جان عشق اوْلاسان
عنان هوشيوي وئر يار هوشيار الينه
او گون كي قسمت ائدوبلر وجودي جزء به جزء
وئروبله رشته صبر و قراري يار الينه
هواي داريله منصور عقل شهبازي
اوچوب، قوْنوب سر گيسوي تابدار الينه
نوْلوردي بيرجه گئديدي خزان، گليدي بهار
دوشيدي دامن گول عندليب زار الينه
حنايه باخ نئجه گؤر بي حيادي، قانه دؤنوب
اوتانميوب قيزاروب ال وئروب نيگار الينه
چكوبدو كامينه كؤنلوم قوشين او زولف سيه
او دار بئلي، دوشه گنجشكْ بچه مار الينه
دئمه بو عاشقه گل تار زولفومه وير چنگ
وجودي چنگ اوْلو گر دوشسه بيرجه تار الينه
بو نوْعيلن كي يانار اوْدلارا يانار صراف

اشعار صراف تبریزی 5

خلاص اوْلونجا سالور نقد خوش عيار الينه
سن مست، عرصه تنگ، اوْل سركشدي وئرمه باش
اگر چه ناز و غمزه او بت طنازه لازیمدیر
ولی ناز ائتمگه بیر حد و بیر اندازه لازیمدیر
گؤتور مرحم طبیبیم توتما زخم سینه سوراخین
بو دارالملک عشقه بیر آچیق دروازه لازیمدیر
کؤنول مشاطه قانین شیشه یه گر توتسا قوی توتسون
رخ جانانه چون زینت زمانی قاره لازیمدیر
اگر سلطان ملک عشق سن وئر ساخلاما باشین
خیال منصب سرداریلیق سربازه لازیمدیر
منی صباغ درد و غم بویار هر گونده بیر رنگه
یقین معشوقه عشقه لباس تازه لازیمدیر
چیخیب ترتیب دن اوراق اولوب مجموعه جسمیم
محبت رشته سیندن جلدیمه شیرازه لازیمدیر
نهفته رازدیر آغزین اونی اغیاره بولدورمه
او گیزلین سره همراز اولماق اهل رازه لازیمدیر
دگیل لازیم کؤنول گنجشکینی پابند زلف ائتمک
او محکم پاچه بند ای نازنین شهبازه لازیمدیر
چمنده باغبان شمشاد و سروین ریشه دن کسدی
گؤروب چون شانه شمشاد او سرو نازه لازیمدیر
دئیین صرافه چوخ لاف محبت ویرما آرام اول
بساط عشقی گؤرمک صاحب اعجازه لازیمدیر

اشعار صراف تبریزی 4

بله‌شیب قانه عجب زۆلف-ی-پریشانین اوْغۇل
اوْلا کۆل باشینه سندن سوْرا دۆنیانین اوْغـۇل
سن‌ایدین زینبیمین مطلب-وْ-منظورو علی
قوْیدۇن آغلار گؤزۆله یاخشێ اوْ رنجورو علی
دۇر گئده‌ک خئیمه‌یه ای گؤزلریمین نورو علی
گؤزۆ یوْللاردا قالێب خئیمه‌ده لئیلانین اوْغۇل
سنی لب‌تئشنه شهید ائیله‌دی بۇ قوم-ی-عدو
گۆلشه‌ن جئسمیوه وئردی دم-ی-پیکانیله سۇ
منده ایندی ائدیره‌م قانیله تجدید-ی-وضو
قارێشیر قانیمه بو چؤلده قێزیل قانین اوْغۇل
مرحبا عئشقینه ائی شبه-ی-رسول-ی-مدنی
ائتمه‌دین محضر-ی-جانانیده شرمنده منى
یاخشێ الوان ائله‌دین قانیله بو گۆل بدنی
سرو تک دۆشدی یئره سرو-ی-خرامانین اوْغۇل
محفل-ی-قربیده اؤز جیسمیم اوْلۇب غئیر منه
کوفه‌دن شامه وئریر جذبه‌ی-ی-حق ‌سئیر منه
بۇ کشاکئشده على! منزل اولور دیر منه
اوج ائدر ناله‌سی افلاکه مسیحانین اوْغۇل
سینه‌می ناوک-ی-درد-وْ-غمه آماج ائده‌رم
زینبین طاقت-وْ-آرامینی تاراج ائده‌رم
منده بو چؤلده کسیک باشیله مئعراج ائده‌رم
قاب قوسینیم اوْلۇر طاقی کلیسانین اوْغۇل
سن وفا گۆلشه‌نینین بیر گۆل-ی-نورسته‌سی‌سن
شُهدا دسته‌سینین عئشقده سردسته‌سی‌سن
اوْلمایا من کیمی بیر سلسله پابسته‌سی‌سن
نیگراندیر گؤرۆره‌م دیده‌ی-ی-گیریانین اوْغۇل
نوش قێلدین ره-ی-جاناندا بلا جامی علی!
چکه‌جه‌کدیر بۇ ایشین شامه سرانجامی علی
بیرجه آچ گؤزلرین ائی قلبیمین آرامی على
گؤر نه احواله سالێبدیر منی هیجرانین اوْغۇل
نور-ی-دیده بۇ کامان قدّیمه بیر ائیله نظه‌ر
تیر-ی-آهه یارالێ سینه‌می چوْخ ائتمه سئپه‌ر
تؤکمه‌سه زینب-ی-مظلومه اگه‌ر اشک-ی-بصه‌ر
یاندێرار عاله‌می آه-ی-دل-ی-سۇزانین اوْغۇل
ائی اوْلان سرو-ی-قدی زینت-ی-مئیدان-ی-بلا
کعبه‌ی-ی-وصلیده قێلدێن نه گؤزه‌ل سعی-وْ-صفا
ائیله‌دین جانیوی مین شوقیله جانانه فدا
درگه‌-ی-حقّیده مقبول اوْلا قۇربانێن اوْغۇل
آغلا صرّافیله بۇ مجلئس-ی-ماته‌مده "ریضا"*
گؤز یاشێن خرج اوْلۇ گؤهر یئرینه روز-ی-جزا
آه اوْ دمده‌ن بۇیۇرۇب اوْغلۇنا شاه-ی-شُهدا
بله‌شیب قانه عجب زۆلف-ی-پریشانین اوْغۇل

اشعار صراف تبریزی 3

چون محبت بزمی خلوت‌دیر عم‌اوْغلێ یا علی
گل ائده‌ک صحبت غنیمت‌دیر عم‌اوْغلێ یا علی
بیر دقیقه قوْیمادێ عالمده قلبین شاد اوْلا
درد-ی-محنتده‌ن موبارک خاطیرین آزاد اوْلا
چوْخ اذیت‌لر سنه وئردیم ائوین آباد اوْلا
ایندی وقت-ی-رفع-ی-زحمت‌دیر عم‌اوْغلێ یا علی
دوْیمادێم بۇ عالم-ی-الفت‌ده سنده‌ن آغلارام
قبرده هم ائیله‌ره‌م شوریله شیون آغلارام
آغلاما مندن سوْرا سن آغلاسان من آغلارام
باخمارام فردوس-ی-جنّت‌دیر عم‌اوْغلێ یا علی
دوْققۇز ایل اوْلدۇم بۇ دولتخانه‌ده همسه‌ر سنه
متّصل وئردیم بۇ دوْققۇز ایلده درد-ی-سر سنه
ایندی گل اگله‌ن باشێم اۆستۆنده سرتاسر سنه
عرض ائدیم نئچچه وصیّت‌دیر عم‌اوْغلێ یا علی
اوّله‌ن عرضیم بۇدۇر اؤلسه‌م اگر بۇ گۆنده من
اؤز الینله‌ن وئر گئجه غوسلیم، گئجه ائیله کفه‌ن
وۇرسا ال تابۇتیمه بیگانه راضی اوْلما سن
روحیمه آرتێق اذیّت‌دیر عم‌اوْغلێ یا علی
ثانییه‌ن منده‌ن سوْرا ائی خسرو-ی-گردون مدار
عورت آلسان بیر نجیبه عورت ائیله ایختییار
غم گۆنۆ تا زینب-ی-کلثومه اوْلسۇن غمگوسار
ائیله‌سین هر نوع حۆرمت‌دیر عم‌اوْغلێ یا علی
بیرده قلبین مجتبادن اینجییه هر آن سنین
گئچ حۆسئینیم جانینه من جانۇوا قۇربان سنین
قوْیما غم چکسین خصوصه‌ن جان حۆسئینین جان سنین
چون اوْ جدّینده‌ن امانت‌دیر عم‌اوْغلێ یا علی
من بۇنۇن چوْخ زحمه‌تین چکدیم نه آسان بسله‌دیم
پرورش وئردیم گۆل اۆسته طورفه-ی-رئیحان بسله‌دیم
سسله‌یه‌نده جان دئ، منده جان دئدیم جان بسله‌دیم
چون جفاسی جانه منّت‌دیر عم‌اوْغلێ یا علی
بۇ حۆسئینی کی سنه تاپشێردێم ایندی رو-به-رو
دقّت‌ایله‌ن باخ نئجه وئرسه‌م ائله آللام گئرو
باش بدنده، بارماق الده، ال بیله‌کده، مو-به-مو
گؤر هامێ عضوین سلامت‌دیر عم‌اوْغلێ یا علی
چوْخ مکدّر اوْلسا وار بۇ سؤزده درد-ی-سر یئری
یاخشێ باخ سالێمدی برگ-ی-گۆل تک آخه‌ر هر یئری
نه باشێندا وار قیلیج نه سینه‌ده خنجه‌ر یئری
نه بدن یئکسه‌ر جراحت‌دیر عم‌اوْغلێ یا علینور-ی-دیده‌م دیر حۆسئن باعیثدی چون گؤز یاشیمه
من گؤزۆمده‌ن سالمامێش سن تاپشێر آل-ی-هاشیمه
ایستی کۆللــه‌ر اۆسته راحت‌دیر عم‌اوْغلێ یا علی
عاشیق-ی-جانبازدیر گیرم حۆسئینیم یوْخ سؤزۆم
منده نقد-ی-عئشقی خرج ائتمه‌کده صرّافم اؤزۆم
بیر بدن دؤرت مین یارا لاکین نئجه گؤرسۆن گؤزۆم
گؤر بۇ اینصاف-وْ-مروّت‌دیر عم‌اوْغلێ یا علی

اشعار صراف تبریزی 2

ائی عم اوْغلێ گتیریب درد-ی-غمین جانه منی
سالێـب آهـو کیمـی بــۇ دشـت-وْ-بییـابانـه منی
نه بیلیر سئلسئله‌ی-ی-عئشقه دۆشه‌ن عار نه‌دیر؟
جـور-ی-بیـگـانـه نـه‌دیـر؟ طعنــه‌ی-ی-اغیـار نـه‌دیــر؟
بـاخمــارام دئیــر-وْ-کئلیســا نـــه‌دی، بــازار نــه‌دیـر؟
گئده‌ره‌م جذبـه‌ی-ی-عئشقین چکـه هـر یانـه منـی
من عزیزه‌م گره‌ک عالــه‌مــده اؤلـه‌م عیـززه‌تیلــه‌ن
هۆده‌ج-ی-تخـت-ی-روانیـم، چکیلــه حؤرمه‌تیلــه‌ن
ایندی هـۆده‌ج یئرینـه، اهـل-ی-جفــا ذیللــه‌تیلـه‌ن
میندیریب‌دیر باش آچێق، ناقه‌ی-ی-عوریانه منـی
نئیزه باشێنـدا باشێــن گـۆن کیمـی جـولانه گلیـب
نــه تجــلّادی تـــماشــاسینـــه بیگــانــــه گـلیــب
چکمیشه‌م هر نه موصیبت بۇ چۆرۆک جانه گلیب
اؤلـدۆرۆر اینـدی نئدیم 1 طعنـه‌ی-ی-بیگانه منـی
من مریض-ی-غم-ی-عئشقه‌م، منه تدبیر نه‌دیر
زولـف زنجیـری بسیـم‌دیـر، داخـێ زنجیـر نه‌دیـر
بیلـمیـره‌م آتـش-ی-آهیمـده کـی تأثیـر نـه‌دیــر
قوْیـۇب عاله‌مده بـۇ نـوعیـلـه یـانـا-یـانــه منــی
گئتمـه‌ره‌م شامـه عـم اوْغلـێ بـۇیـۇر آخه‌ر نئـده‌ره‌م
معجه‌ریم یـوْخســا یــۆزه زولفیمــی حاییــل ائـده‌ره‌م
آلمێشـام گـوشـه‌ی-ی-ویرانـه سـوْراغێــن گئـده‌ره‌م
خـــانــه ویـران ائـــده تـــا منــزیـل-ی-ویــرانـه منــی
نئیــزه‌ده بیــرجـه دوْلان حـال-ی-پـریشـانیـمـه بـاخ
دل-ی-بـوریانیمـه باخ، سینـه‌ی-ی-سـوزانیمـه بـاخ
قارێشێب‌دیر گؤزۆمـۆن یاشـێ، جیگـه‌ر قانیمـه باخ
نئجـه گـؤر غـرق ائلـه‌ییـب لالـه صیفـه‌ت قانه منی
عقـره‌ب-ی-زولفـی قـرین-ی-مـه-ی-تـابـان ائلـه‌دیــن
مـن پریشـانــی عجـــه‌ب زار-وْ-پـریشــان ائـلــه‌دیـــن
سینه‌می نـاوه‌ک-ی-موژگانیلـه شـان-شـان ائلـه‌دیـن
ائیلـه‌دیـن خانــه‌ی-ی-زنبــوریـلــه هــم خــانــه مـنـی
اکیلیب آیینه‌ی-ی-حـوْسنیوه کـؤنلـۆم کیمـی گَرد
دۆزۆلۆب عوره‌ت اۇشاق، پیر-وْ-جـوان-وْ-زن-وْ-مـرد
هامێ‌نێن فیکری بۇدۇر دردیمین اۆسته قوْیـا درد
گتیریب نئـی کیمـی بـۇ درد-وْ-غـم افغـانـه منـی
بــۇ قـده‌ر زولفیـوی روخســاره نیقـاب ائتمـه‌گیـلــه‌ن
بۇنـدان آرتێـق منـی، گَـل خـانـه خـراب ائتمـه‌گیلـه‌ن
قوْی جمالین گؤره شام اهلی، حیجاب ائتمـه‌گیلـه‌ن
چـون بیلیـر قـوم-ی-جفـا، بـوْش یئــره دیــوانه منــی
آغلارام بزم-ی-موصیبتده، سنـه تـا ساغـام
شهر-ی-تبریزیـده صرّاف کیمـی دوستـاغـام
نئچه مودده‌تدی سنین درگَهیوه موشتاغـام
ایسته حضّاریله بۇ وقفه‌ی-ی-قۇربانی منـه

اشعار صراف تبریزی 1

ای جمالی مظهر آیات کبرا یا علی
وی جلالیندن جلال حق هویدا یا علی
فیض جودیندن وجود ماسوا موجود اوْلۇب
ائی وجود ماسوایه فیض عظما یا علی
نور حق آیینه‌ی ذاتینده اوْلمۇش جلوه‌گر
ای صفاتُ‌اللاهه مرأت تجلّا یا علی
لوح حسنونده یازێلمێش آیه‌ی اللهُ نور
صورتینده کلمه‌ی مشکاة معنا یا علی
سن بۇ مخلوقاته باب علمی مفتوح ائیله‌دین
شاهدیمدیر سوره‌ی انّا فتحنا یا علی
الف قدّین خلقه لاء نفی اثبات ائیله‌دی
کلمه‌ی توحیده سن‌سن الف الّا یا علی