اشعار از پرويز خدادادي 12

چاره سيز درده گرفتار اوْلموشام درماني يوْخ
بير شيرين ديل دلبره بئل باغلاديم ايماني يوْخ
قوْيدي واحد گوشه ميخانه ده يوْل باشلادي
من تك هجرينده اوْنون قان ياش تؤكن خواهاني يوْخ
دورنا تك گردن چكيب دائيم منه ناز ائيله دي
نازيني چكمه كده آنجاق من كيمي قورباني يوْخ
گؤزلري بحري خزر تك بير باخيشلا سحر ائدير
دالغالي دريايه دوشموش عقليمين فرماني يوْخ
هجرينين دردينده پرويز قالدي واحيد بيلمدي
خلوتي ويرانه ده افسوس اوْنون مهماني يوْخ

اشعار از پرويز خدادادي 11

اي عاشقي مين درده ساليب اوْينادان هجران
معشوقي  بو  گوندن  صاباحا  آلدادان  هجران
اي عشق  ائويني  باده وئرن يانديران  آتش
گؤز يوْلدا قوْيوب سينه لري داغلادان هجران
ال چك بو جفا پيشه  ليگيندن  داها  بسدير
رحم ائيله گيلن عاشقه اي شارلاتان هجران
اوْل گون كي يارالدي بو لطافت ده طبيعت
اوْدون سن ازلدن آراني هئي قاتان هجران
سالدون  آنالاردان  آرالي مرد ايگيد اوْغلون
مين لر باجي نين گؤزلريني آغلادان هجران
آخر نيه  ال  چكميسن  اوْل  جور و جفادان
ساچ يوْلدوروبان ديده لري ايسلادان هجران
قوردون يوْلوم اوسته توْرونو دامينه دوشدوم
يارين  اوزونو  گؤرمه گه يوْل باغلادان  هجران
صامت  بيليرم  هجر  اوْدونا  ياندون  اذلدن
سن ياره چاتان گون ياناجاقدير نادان هجران

اشعار از پرويز خدادادي 10

گؤردوم سني دامدا  گئجه  مهتاب آراسيندا
ايلك عشقيمي آي قيز او گؤروش ياديمه سالدي
آي چيخميشيدي، زولف پريشانين اسيردي
زولفون اول  پريشانليغيمي  ياديمه سالدي
آيدين گئجه  زولفون  داغيليب دالغالانيردي
هيجران چكن اول گونلريمي ياديمه سالدي
آيداندا  گؤزل  دوره ده  بير هاله  سالينميش
كئچميش ده گؤزل خاطيره مي ياديمه سالدي
فيكريم قاريشيب دالغالانيب جوشدو خياليم
ديلداريمين  اول  تئللريني  ياديمه  سالدي

اشعار از پرويز خدادادي 9

يوكله نيب داغلارجا غم  كؤنلومده درمان ايسته رم
درديمه مرحم قويان محرم بير انسان ايسته رم
سئوله يم چكميش بلالاردان باشيم بير بير اونا
دينله ييب غمخوار اولان بير دوغرو جانان ايسته رم
باشدا كي دن لردي احواليم پريشان ائيله ين
هر دنين مين دردي وار درديمه درمان ايسته رم
گؤز ياشيم آخمير داها گويا باتيبدير چشمه سي
آخماقا گؤز ياشلاريم بير گوجلو باران ايسته رم
باتميشامن چوخدان ياسا ماتم سرا دير منزليم
كونلومو شاد ائيله ين سر خوش غزلخوان ايسته رم
گؤرمه ديم عؤمروم بويو گولسون اوره كدن بير يوزوم
گؤزلريم قان آغلاسين ، دنياني خندان ايسته رم
وئرمه يير رخصت بو دنيا درديمي اعلان ائدم
نطقه گلمك دن اؤتور هر لحظه امكان ايسته رم

اشعار از پرويز خدادادي 8

ساكت اول اي اوره گيم ناله و افغان ائله مه
قوي ووروم عمري باشا ديده مي گريان ائله مه
من بيچاره يه رحم ائت، كرم ائت بيرجه دايان
اسمه اي باد صبا زولفي پريشان ائله مه
يومول اي گؤز كي نگاريم سر كويينده ده ييل
چيخما اي مه بو گئجه نوريني افشان ائله مه
گئتدي ياريم نئچه منزل نه بيليم بوردان اوزاق
ياغما اي قار، اوره گه عمري زمستان ائله مه
نه او حال اهلي يم اي دل كي قيلام ترك ديار
بو دياري منه سن گوشه ي زندان ائله مه
صامتين ناله سي اي مه دوتار آخرده سني
گل قوي اولسون گؤزوم آيدين اوره گي قان ائله مه

اشعار از پرويز خدادادي 7

آتش  هجرين  مني  يانديردي  آخر  گلمه دين
سوزي عشقينده آليشديم من سراسر گلمه دين
كئچدي عمرون خوش گونو آه و فغانيمله گؤزل
گؤز ياشيم سئيل اولدو جانا ييخدي ائولر گلمه دين
فرقت ايامينده سن هئچ واخت ديليمدن دوشمه دين
بيرده رخسارين گؤره م ، اولماز ميسر گلمه دين
گؤزلريم يوللاردا قالدي بلكه رخسارين گؤرم
تير مژگانينله آتدين كؤنله خنجر گلمه دين
قالدي حسرت كؤنلوده، سن سيز قراريم اولمادي
باده ي ناب الده قالدي بيرده ساغر گلمه دين
شاعير شوريده يم من گلشن عشقيم خزان
گؤز ياشيملا عاقبت ايسلاندي دفتر گلمه دين
چالدي هيجران نغمه سين دولدوم سراسر ماتمه
هجريدن هر گون سوزالدي ياندي گوللر گلمه دين
آتش هجرين منيم ايلقاريمي سست ائتمه ييب
اسدي اون دوققوز باهار عمريده ايللر گلمه دين
صامت ثابت قدم كويينده سر گردان اولوب
نامه گؤندردي سنين چين هئي مكرر گلمه دين

اشعار از پرويز خدادادي 6

صداقت وارسا گر سنده قدم قوي خانه مه ساقي
نظر سال هجريدن ويران اولان ويرانه مه ساقي
اولوبدور مبتلا كؤنلوم يانير ائل دردينه بيلمم
نه دير حكمت آچار دوشمور درِ كاشانه مه ساقي
نه درمان گؤسته رير خالق نه مخلوق ال چكير مندن
بو ظلمتده گليب دولدور مي پيمانه مه ساقي
دئيه رديم دردي جانانه اودا دوشموش اوزاق ائلدن
من اؤلسم درديمي حكما يئتير جانانه مه ساقي
يوز ايلده صامتين دردي ائلينده لا علاج اولسا
قوي اولسون سريمي يوخ – يوخ دئمه بيگانه مه ساقي

اشعار از پرويز خدادادي 5

ساكت اول اي اوره گيم ناله و افغان ائله مه
قوي ووروم عمري باشا ديده مي گريان ائله مه
من بيچاره يه رحم ائت، كرم ائت بيرجه دايان
اسمه اي باد صبا زولفي پريشان ائله مه
يومول اي گؤز كي نگاريم سر كويينده ده ييل
چيخما اي مه بو گئجه نوريني افشان ائله مه
گئتدي ياريم نئچه منزل نه بيليم بوردان اوزاق
ياغما اي قار، اوره گه عمري زمستان ائله مه
نه او حال اهلي يم اي دل كي قيلام ترك ديار
بو دياري منه سن گوشه ي زندان ائله مه

اشعار از پرويز خدادادي 4

اي قرا بختيم مني آخر گرفتار ائيله دين
روزگاريم باده وئردين، سن مني خوار ائيله دين
هر نه وار دوستوم چكيب ال قويدولار واحد مني
سنده كي غم، غصه ني كؤنلومده انبار ائيله دين
باغلادين سن يوللاري دوستاقدا قالديم دائماً
يانديريب بال و پريم دوستاقدا بيمار ائيله دين
چيخمارام هئچ واخت يولومدان سن مني سالدين تورا
حبس ائديب زنجيره چكدين چوخدا آزار ائيله دين
آلدين الدن جسميمي ال قويدون آخر روحيمه
روحي مي اينجيتدين هر دم سن مني زار ائيله دين
من كي آزاريم يئتيشمزدي زماني بير كسه
سن جفا ائدمكده ظاليم باخ مني هار ائيله دين
صامتي آواره قويدون يوخ پناه و بير كسي
ايللري بيهوده سوردو زولفوني قار ائيله دين

اشعار از پرويز خدادادي 3

وصف ائديم مجلس عشقي سنه اي نازلي نيگار
بو مقدس يئره گل گور كي محبت دولانار
آي دوروب ماوي سماده نئجه اولدوز اوتانار
بوردا چوللرده گزه نازلي ياشيل باش صونالار
بوردا عاشيق لر آلار سينه لره سوزيلي ساز
بوردا معشوق ائيله يير عاشيقيلن راز و نياز
بوردا قيش يوخدو پاييز يوخدو فقط يازيدي ياز
اوخويار ماهني عاشيق باده ده هردم دولانار
بوردا مستانه گليب باده ناب الده دوتار
گئجه لر هاممي اوياق قالمادا خوابين اونودار
بوردا ساقي دولانار حوري – پري عشوه ساتار
قويما ساقي بو يئره ناكسي ازدم دولانار
بوردا زم زم سويو وار چشمه لر البته آخار
چيمر آينالي سولاردا او ياشيل باش صونالار
دورنالاردا چكر هردن گؤيه بير ماوي قاطار
سحرين عطري ساچيب يارپاغي شبنم دولانار
او شيرين نغمه لره شمع ايله پروانه يانار
بوردا غم - غصه تاپيلماز تاپيلار نار گيله نار
يولچو دينلر بوراني هيكل اولوب لال دايانار
قويما دولتلي گليب بوردا دا درهم دولانار
بي ريا مجلسيميز وار، هاممي يولداشدي تمام
دوشسه گر موشگوله ايش يوز بيره قارداشدي تمام
آغ بولودلار بيزه سو وئرمه ده حلاش دي تمام
خوشلاماز طايفه ميز ياد بورا ، سهوا دولانار

اشعار از پرويز خدادادي 2

يوكله نيب داغلارجا غم  كؤنلومده درمان ايسته رم
درديمه مرحم قويان محرم بير انسان ايسته رم
سئوله يم چكميش بلالاردان باشيم بير بير اونا
دينله ييب غمخوار اولان بير دوغرو جانان ايسته رم
باشدا كي دن لردي احواليم پريشان ائيله ين
هر دنين مين دردي وار درديمه درمان ايسته رم
گؤز ياشيم آخمير داها گويا باتيبدير چشمه سي
آخماقا گؤز ياشلاريم بير گوجلو باران ايسته رم
باتميشامن چوخدان ياسا ماتم سرا دير منزليم
كونلومو شاد ائيله ين سر خوش غزلخوان ايسته رم
گؤرمه ديم عؤمروم بويو گولسون اوره كدن بير يوزوم
گؤزلريم قان آغلاسين ، دنياني خندان ايسته رم
وئرمه يير رخصت بو دنيا درديمي اعلان ائدم
نطقه گلمك دن اؤتور هر لحظه امكان ايسته رم

اشعار از پرويز خدادادي 1

سن گلسن عزيزيم دئه كؤنول شاد اوْلار اوْلماز ؟
سن سيز دل زاريم دوْلو فرياد اوْلار اوْلماز ؟
يوز طعنه وورورلار منه سن سيز دوْزورم من
سن گلسن ائليم گون به گون آباد اوْلار اوْلماز ؟
چوْخداندي يانير آتش عشقينده بو كؤنلوم
گلسن بو يانيق قلبيمي دلشاد اوْلار اوْلماز ؟
زنجير اسارتده قالانلار كيمي قلبيم
چيرپينمادان آخر دئه كي آزاد اوْلار اوْلماز ؟
داغلار باشي قار، سينه سي نار، يار سني گؤزلر
گلسن بو ائلين هر طرفي شاخيله شمشاد اوْلار اوْلماز ؟
شانيم شرفيم شوكتيم آرزيم ديله گيم سن
سن سيز منه آيا دئه كي امداد اوْلار اوْلماز ؟
سن سيز منيم آغزيمدا شكر زهريدي اي گول
سن گلسن آغيزدا همه شه داد اوْلار اوْلماز ؟