اشعار دده کاتب 9

کؤنول نفسین اؤلدورمه میش ریاضت ده یالان دیر
حرام مالدان احسان اولماز سخاوت ده یالان دیر
بیر اینسانین اؤزنفسینده گر لیاقت اولماسا
دده-بابا سولـطان اولسا نیجابت ده یالان دیر
کیچیک لره تعلیم ائیله بؤیوک لره احترام
یوخسوللارین حالین یوخلا  دوشگونلره وئر سلام
یارادانا قوللوق ائله ، خلقه خدمت والسلام
اگر قصدین شوهرت اولسا او خیدمت ده یالان دیر
بیر آی اوروج ،بئش واخت ناماز، الده تسبیح سجاده
گئجه-گـوندوز ذیکر ائده سن حاجا گئدسن پیاده
شیطانا یوز داش آتاسان قوربان کسه سن میناده
کؤنلونده بیر رحم اولماسا عیادت ده یالان دیر
دده کاتیب دورما چالیش نه قدر وار ایختیار
ایشله، قـــازان بـویون اگمه،ایش دیر سنه ایفتیخار
گرچی رزق موقدردیر آما حرف آشکار
چالیشماسان روزی یئتمز او قسمت ده یالان دیر

اشعار دده کاتب 8

دلی کونول،دور شوکر ائیله لوطف یزدان بیزده دیر
صدق ایمان،بیر حقیقت، اصل ارکان بیز ده دیر
کــــــــان ادب هـــــم شفاعت رحمه للعالمین
یوز ییرمی دورد مین ایچینده شمس جیهان بیزده دیر
باخ احسانه عدالته امر ائدیب سوبحانیمیز
اوخونور حکم اینسانلیق ثابت دیر قورآنیمیز
بئش قاره یئددی ایقلیمده وار شوکت- شانیمیز
دورد کیتابی متممی حکم قورآن بیز ده دیر
روز الست خیطاب قیلدی بیزه رب  العالمین
قالو بلی بیزلر دئدیک موژده میز  واردی یقین
دینیمیزدن روشن اولدو ظولمت سطح زمین
حکم زمین حکم سما حکم رضوان بیز ده دیر
بیرکلمه توحید ایله مسند صدر بیزیم
خمسه صلات صوم زکات لیله القدر بیزیم
حب الوطن مرده جهاد هم ماه بدر بیزیم
آب حیات باب نجات بیت رحمان بیز ده دیر
کاتیب سوزون دوغرو دئدین به اذن پروردگار
آنلیانلار فیکر ائیله سه یاخشی بیلر هر نه وار
بیر گون اولار حق و باطل تامام اولار آشکار
هامی بیلر دوغرو کلام دوغرو زبان بیز ده دیر

اشعار دده کاتب 7

بیرآللاهـــین قـــودره تـــینه اینــــانــان
مــیننت تــیکه سینی وورمــاز دیشینه
سن عبـــدیسن اوز عـــملین وار یاشا
عــــقل چـــاتــماز یـــارادانیـــن ایشـینه
یوکلنیب دونیادان هئی گئدیر کــاروان
هئچ ده فرق ائیله مز شــاه وگدا، خان
زحمت چکن میننت چکمز بــیل ایـنان
بــــوینون اگـــیب الین قــویماز دوشـونه
شیرین دانیش داماغیندا داد اولـسون
ادبــــسیزین  یـــوردو بــر بــاد اولـــسون
دوللو موصطفا نین روحو شاد اولسون
یاخشی دئـییب اینسان گــرگ دوشونه
دده کاتیب تئز اود آلــــیب آلـــیشما
هــــر یئـــتنین سن ایــشینه قــاریشما
مصلحت اولماسا دینــیب دانــــیشما
اینسان گرگ سوزون سالسین کئشینه

اشعار دده کاتب 6

بئش گون یاز باهارا آلدانان اینسان
یازین گتسه قیشیندادیر تاماشا
مغرور اولوب قورولوقدا آت قووان
باتلاقلارا دوشنده دیر تاماشا
زامان دؤنر هر واخت بوگون اولانماز
قوجالیقا لقمان چاره بولانماز
سیندین کئچر قان داماردا دولانماز
آیاقلارین شیشنده دیر تاماشا
گوونمه گوجونه بوکولر بئلین
توکولر آیلارین قورتولار ایلین
تؤکولر دیشلرین دوز دئمز دیلین
پلتک ووروب چاشاندادیر تاماشا
دده کاتیب گولوسیتانین سولاندا
حق صاحیبی امانتی آلاندا
جانسیز جسد تورپاق آلتدا قالاندا
یئر قوردلاری دئشنده دیر تاماشا

اشعار دده کاتب 5

بو گون عجب بیر قوش گؤردوم
آدین سوردوم همن طوطی
افسوس سنین موصاحبین
اولوب زاغ ،زغن طوطی
عربجه بوبغادیر ایسمین
یارادان خوش چکیب رسمین
دیلین اینسان قوش دو جسمین
فارسی شکرشکن طوطی
طوطا مرغ هندوستانسان
استانبولدا پاپاغان سان
سن آزاد اهل اورمانسان
یوخ کی زیندان مسکن طوطی
دده کاتیب نه بحثیده سن
نه غوغادا نـه سسده سن
حاییف باغلی قفسده سن
نه سن آزاد نه من طوطی

اشعار دده کاتب 4

دیوانه دیل دوغـرو دولان کونلون ائوین ائیله صاف
دوغرو یاشا دوغرو دانیش هئچ کیمسه دن ائتمه خاف
هر ایشینده بیر آللاهی دوغرو چاغیر یاد ائیله
هئچ کیمسه دن چکمه میننت ،میننت یعنی کـوه قاف
او گون کی وجودا گه تدی خالق سبحان سنی
موقددر ائیله میش ریزقین قادیر حی غنی
بنده اونو اونوتماسا او اونوتماز بنده نی
درد ه درمان یاراداندیر هر طبیبه ائتمه لاف
سن نامرده بویون اگمه اگری قالار قامتین
دوغرو یاپیش اتگیندن حقده ن ایسـته حاجتین
حق وئــره نه قانع اولسان آرتیق اولار حورمتین
قناعت بیر کیمیادیر بوندا کی یوخدی خیلاف
سن باخ خالیقین ایشینه یارادیب هفتاد و دو
هر کس اوزون حق تانی ییب دئسم چوخدو گـفتگو
دده کاتیب یار غولامی نه از اینم نه از او
نه صـرافم دور سـئچرم نه زرگرم نه زر باف

اشعار دده کاتب 3

ایستیرم سوی تانیدیرام
تورکی جه دیر منیم دیلیم
 موسلمانام ایمانلیام
آذربایجان ائلیم منیم
اورمولویام انزل لی یم
دوشمن لرین انگلی یم
حلق لرین چنگلی یم
چوخودو فـند-فئلیم منیم
 صفالی اوجا داغـلاریم
گؤزه ل میوه لی باغلاریم
مخصوصا باهار چاغلاریم
 آچار غونچه گولوم منیم
 ایگیدلره آرخالانیم
 نهنگ تک چالخالانـیم
سـولاریندا یایخالانیم
گؤزه ل اورمو گؤلوم منیم
 شاعـیرلریم ، اوزانلاریم
سـؤنمز قاینار قازانلاریم
ووروب دوشمن پوزانلاریم
 سارسلمایان قولوم منیم
اساس سویوم اوغوز نسلی
دده قورقوت تک هـوسلی
آشیقلارین خوش نفسلی
میضراب چالیر تئلیم منیم
اورمیه لی ارسلانلار
تبریزلی تک قهرمانلار
گئری دؤنمز قوچ اوغلانلار
دولوب ساغیم-سولوم منیم
 دده کاتیب ائله قوربان
خوش دانیشان دیله قوربان
 یئره گلمز بئله قوربان
حقه باغـلی بئلیم منیم

اشعار دده کاتب 2

ده لی کؤنول نئچه جمله ائیله بیان کؤلگه سیز
یارادان امانت وئریب جسدده جان کؤلگه سیز
کایناتی او یارادمیش معنویدن-ماددیدن
ایشیغین وئرمیش جهانا شمس تابان کؤلگه سیز
عقل یئتمز حکمتینه سن بیر علم اللهه باخ
کؤلگه نوردان ایجاد اولار بوتون خلق اللهه باخ
منصور حلاج نه دئدی فناء فی اللهه باخ
نور حق ظاهر اولاندا اولار هریان کؤلگه سیز
ملائکه نوردان یارانیب جیسمه خلاف بیل یقین
عین عیان ، نطق بیان ، آب شفاف همچنین
مومن لرین کؤنلو آیدین آینه ی صاف همین
دریالاردا موج روان ، باد- طوفان کؤلگه سیز
دده کاتیب گز جهانی دققته آل هر یانی
ارض و سما ، کهکشانلار فکره سالیر انسانی
جبراییلا گه تدی رسولا حق یانیندان فرمانی
اوخونور اینسانلیق درسی حکم قرآن کؤلگه سیز

اشعار دده کاتب 1

کؤنول کیمیادیر عؤمرون باهاری
سولاجاق بوداقلار اؤلاندن سونرا
فرصت گئتسه حسرت بره باغلاماز
بیرده دؤنمز ساغلار اؤلندن سورا

دم غنیمت چالیش قازان ساغ ایکن
آتشی سؤندورمه قازان داغ ایکن
دئ دانیش دیل دوداق داماق ساغ ایکن
باغلانار دوداقلار اؤلندن سونرا

آدام وار دادماییب دوسلوق شربتین
وقتی بیلمز الدن وئره ر فرصتین
ساغلیغیندا بیلمز دوستون قیمتین
افسوس ائیلر آغلار اؤلندن سونرا

ده ده کاتیب هئچ قوروتماز دیده سین
کیم ساغالدار اوره گینین زده سین
اوغول واردیر هر گون دؤیه ر ده ده سین
اوچ آی قارا باغلار اؤلندن سونرا