زندگی نامه معجز شبستری

میرزا علی معجز شبستری فرزند حاجی آقا ، در سال 1252 هجری شمسی در شبستر كه در آن زمان قصبه ای كوچك بود تولد یافت . میرزا علی در مكتب خانه خواندن و نوشتن را آموخت . در سن شانزده سالگی (68-1267 هجری شمسی) پدرش فوت شد . بعد از فوت پدر برادانش كه در استانبول به تجارت مشغول بودند ، علی جوان را به استانبول بردند . علی در استانبول فرصت تعلم و مطالعه بدست آورده و ضمن كمك روزانه به برادران خود به مطالعه در تاریخ و ادبیات میپردازد . علی را عشق وطن و دردغربت آزار میداد . بهمین جهت بعد از حدود سیزده سال واندی زندگی در غربت استانبول به شبستر باز میگردد

برو به ادامه مطلب...

ادامه نوشته

اشعار معجز شبستری 5

باشیما زلف قویوب ساققالی قیخدیرمامیشم
خلق دن رشوت آلیب کیسه می دولدورمامیشام
جدیزین وقف سویون ملکیمه آچدیرمامیشام
ای شبسترلی داداشلار سیزه من نیله میشم
بیر قران پول آپاریر دولت ایران دریدن
ظلم ائدیر فرقه قصابه اوتانمیر تاریدن
مهر ذبحیه آلیر باج ئولیدن هم دیریدن
من بئله ظلم و ستم خلقه روا گورمه میشم
ای شبسترلی داداشلار سیزه من نیله میشم
گوروسیز من نه آژانم، نه قازاق ای کیشیلر
گورمیوب قوندارا هرگز بو دابان ای کیشیلر
سالمیشام لیفه شلواریمه باغ ای کیشیلر
پانتولون گئیمه میشم بوغلاریمی بورمامیشام
ای شبسترلی داداشلار سیزه من نیله میش
کفرمه حکم ائله دیز هانسی گناهیله منیم
جرمیمی ثابت ائدیب مجلسه دیندیرمه میشم
نه طلاق ایله ایشیم وار نه نکاحیله منیم
قیزیزی حاضر ائدیب مجلسه دیندیرمه میشم
ای شبسترلی داداشلار سیزه من نیله میشم
من فلان کس دگلم، صیغه مه ایراد ائده سن
گئت کبین کسمه دیه اوستومه فریاد ائده سن
ییخاسان خلقین ائوین ئوز ائوین آباد ائده سن
من هله هیچ کسین قلبینی سیندیرمامیشام
ای شبسترلی داداشلار سیزه من نیله میشم
ای عمو چک قیلیجون ائیله مربایه هجوم
شیر برنجه، خامایا، هم قارا دولمایه هجوم
بی جهت ایلمه چوخ “معجز” شیدایه هجوم
من مگر ایلده بش اون یول سیزی گولدورمه میشم
ای شبسترلی داداشلار سیزه من نیله میشم

اشعار معجز شبستری 4

گونده بیر پولسوزی قصاب اجل داره چکیر
برکیدیر ال آیاغین اوستنه  قداره  چکیر
باهالیقدان نه لر او کاسب بیچاره چکیر
چوره گه وئرمگه یوخ درهم و دیناری داداش
قره پولدور کیشینین غم گونی غمحواری داداش
 قیزیلی قیز کیمی آل قوینووا یات تا به سحر
سنه نه گر اولا دنیا هاموسی زیر و زبر
کمره قویما زر و سیموی ای نور بصر
جان کیمی باغریوا باس درهم و دیناری داداش
چونکه پولدور کیشینین غم گونی غمخواری داداش
 ایسته سن راحت اولوب کئف چکه سن یای و قیشی
قیچون آروات قیچینا چاتما آبیچاره کیشی
انگیوی ناللاما بیجا یره دولدور جیبیشی
چونکه پولدور کیشینین غم گونی غمخواری داداش
جان کیمی باغریوا باس درهم دیناری داداش
 اولا گر آی کیمی هم حسن و جمالی کاسبین
عقلین آزسا خوشونا گلسه خیالی کاسبین
وارلی آلماز قیزینی باشی بلالی کاسبین
بونی یوز یرده سنه امر ایلییب تاری داداش
جان کیمی باغریوا باس درهم دیناری داداش
 نه قدر چرکین اولا وارلی قیزی آل قوجاغا
بنزیه گر صفتی رندییه، باشی قاباغا
چونکه او درهم و دیناردی باشدان آیاغا
جان کیمی باغریوا باس درهم و دیناری داداش
بونی یوز یرده سنه امر ایلییب تاری داداش
 پوللی حمامه گلنده ییغیشیرلار یانینا
اوستا، رشبر، جامادار کیسه چکرلر جانینا
یاغلی قویروقدوی هره بیر پای آتارلار دامینا
چونکه پولدور کیشینین غم گونی غمخواری داداش
بونی یوز یرده سنه امر ایلییب تاری داداش
 پوللی هر هفته بویار ساققالینی قیر کیمی
میل ائدر قایقاناقی نعره چکر شیر کیمی
یوخدی پول قدری بیلن دهرده جیب گیر کیمی
چونکه پولدور کیشینین غم گونی غمخواری داداش
بونی یوز یرده سنه امر ایلییب تاری داداش
 پاراسیز اولمیاسان، کار اولاسان، کور اولاسان
پول الوندن یاپیشا عازم بازار اولاسان
دار دنیاده اگر ایسته میسن خوار اولاسان
جان کیمی باغریوا باس درهم دیناری داداش
چونکه پولدور کیشینین غم گونی غمخواری داداش
 پلووی پوللی ائدر میل بو بیر قاعده دور
فیرنی شهد شکر پولسوزا بی فائده دور
سوزیمه ایله عمل گر قولاغین دائی ده دور
بونی یوز یرده سنه امر ایلییب تاری داداش
جان کیمی باغریوا باس درهم دیناری داداش
 چاشتیه پوللی ییه ر کوفته نی غلیانی چکر
خواب شیرینه گئدر باشینه یورغانی چکر
فقرانین پولی یوخ محنت ایامی چکر
چونکه پولدور کیشینین غم گونی غمخواری داداش
جان کیمی باغریوا باس درهم دیناری داداش
 گله بلبل کیمی عاشقلق ائدیب یورما سه سین
عاشق سیم و زر اول عشقه اگر وار هوسین
گل نه دور، عشق نه دور، پولدی سنین دادرسین
بونی یوز یرده سنه امر ایلییب تاری داداش
جان کیمی باغریوا باس درهم دیناری داداش
 یوخدی بیز زاد جهاندا قره دن ایسته مه لی
پولیله ممکن اولار سبزه، تبرزه، عسلی
یوخلاما جان قولاغین وئر منه ای رستم علی
بونی یوز یرده سنه امر ایلییب تاری داداش
جان کیمی باغریوا باس درهم دیناری داداش
 بیر کرور اهل وطن قان قوسور ایراندا بو گون
فقرانین ازیلیر باشی دگیرماندا بوگون
دییرم من بو سوزی هر کسه هر یاندا بو گون
قره پولدور کیشینین غم گونی غمحواری داداش
جان کیمی باغریوا باس درهم دیناری داداش
 حاجیلار صدر مجالسده همیشه قورولور
سوزی گئچمز کاسبین بوش یره آغزی یورولور
پولی پولسوز ئولونین اوجونا قویسان دیریلیر
چونکه پولدور کیشینین غم گونی غمخواری داداش
جان کیمی باغریوا باس درهم دیناری داداش
 مجلسه داخل اولور پوللی خانیم لاله کیمی
یاد و بیگانه آلیر دوره سینی هاله کیمی
سفره ده تک قالی پولسوز باجی غساله کیمی
چونکه پولدور کیشینین غم گونی غمخواری داداش
جان کیمی باغریوا باس درهم دیناری داداش
 یار و یولداش و رفیقین هامیسیندان آ کیشی
چونکه یوخدور سنه بیر فایدا بولاردان آ کیشی
دوست بسدور سنه قوینونداکی جزدان آ کیشی
جان کیمی باغریوا باس درهم دیناری داداش
چونکه پولدور کیشینین غم گونی غمخواری داداش
 یار و یولداش قارا گونده قویاجاقلا سیزی تک
گر آجیندان ئوله سن بیر تیکه وئرمز له چوره ک
یانوا قویما بغیر از لئره، مجدیه، چره ک
جان کیمی باغریوا باس درهم دیناری داداش
چونکه پولدور کیشینین غم گونی غمخواری داداش
 گرچه واعظ سنه هی ترک ائله دنیانی دییر
جان کیمی باغریوا باس حوری و غلمانی دییر
اده! معجز ده سنه بو سوزی پنهانی دییر
سوزیمه ایله عمل ای قره گوز، ساری داداش
جان کیمی باغریوا باس درهم دیناری داداش
چونکه پولدور کیشینین غم گونی غمخواری داداش

اشعار معجز شبستری 3

دئدیم آنا منه بیر یار گل دهان آلاسان
که یعنی اوغلوا بیر خوش تکذبان آلاسان
دئدی: اوغول گوریرم عشق ائدیب سنی بنده
یانیر چراغ محبت سرای سینه نده
صباح سنه تاپارام بیر تکذ، فقط سن ده
گرک اونا زری یل، هم مادام تومان آلاسان
دئدیم آنا آلارام هر نه ایسته سن فوری
فقط بیرین آلاجاقسان که مثل بیر حوری
ائده اوتاقی منور جمالینین نوری
لبی شکر، گوزی شهلا، قاشی کمان آلاسان
دئدی قبول ائلدیم سوزلرین تمامین من
گئدیب سنه تاپارام بیر نگار غنچه دهن
جمالی گون کیمی روشن، فقط گرک هم سن
بش آلتی پردی و بیر دشته کرواشان آلاسان
دئدیم اولار نه یه لازمدی؟ سویلدی: آبالا
بو رسمدر که گلین قاین آنا ایدر دعوا
او کرواشانی قاپار چون هجوم ائدر آناوا
آماندی پردینی سن گوتوروب دابان آلاسان
آرایه گیرمه اوغول اللرین باتار قانه
نه آرخا چیخ منه، نه غنچه لب تکذبانه
اگر تکذ منی ئولدیردی سالدی میدانه
برای غسل گرک قونشودا قازان آلاسان
نه قدر معجز آنان ساغدی دوشمه بو هوسه
هاچان که ئولدی آنان گیر نگاریله قفسه
رذیل اولارسان اوغول قونشولار گلنده سه سه
نه قدر وار او، مبادا تکذبان آلاسان

اشعار معجز شبستری 2

خوش اولار سیزین دیارین گل و لاله و هزاری
او هزار و لاله زارین نغماتی بی نهایت
او طرف گوزه للرینین گوزی، قاشی دلربادر
حرکاتی جانفزاهم، سکناتی بینهایت
وئریر ال اله قیز اوغلان دانیشار، گولر، ایچرمی
چالینار کمانچا و نی، ائدر استماع الف بی
لب یاری یار ئوپنده دییه ر عرش و فرش اوخی
سه وه رم عموغلی من ده او حیانی بی نهایت
بیزیم ئولکه ده ولکن گولوب اویناماق دانیشماق
قدغندی تار چالماق و کمانچانی ائشیتماق
دفه سیللی وورماق اولماز و گناهدر می ایچماق
ولی باشا وورماغین وار حسناتی بینهایت
یوزینه بیزیم گوزللر سالی بیر نقاب قالین
میکروسکوپیله باخسان گوره بیلمه سن جمالین
بیری گر آچا جمالین توپوره ر اونا ملاعین
داما تیر سالاندا سویلر صلواتی بینهایت
آغا چیخدی منبر اوسته نئجه گور چیخیر ئوزوندن
دانیشیر غروریله باخ، نئجه اود چیخیر گوزوندن
ائله قیشقیریر که منبر تیتیریر اونین سوزوندن
بویورور بو سوزلرین وار صلواتی بینهایت
اوخویوب یازان خانملار یازار عاشقینه نامه
او که یازدی نامه دینن گئده جک اسیر شامه
وئره هر کس ای جماعت قزینین الینه خامه
اولی روز حشر او شخصین حسراتی بینهایت
دئدی دوشدی چون نفسدن او جناب اشرف الناس
من ایاقه دوردوم اوندا دئدیم: ای گروه نسناس
دییین او گوبک یازانه قلمین اوجون یاواش باس
گوبگینی اینجیدیرسن عوراتی بینهایت
بیلیرم نه در خیالی حضراتین ای محبان
دییسیز که خدمت ایلر بیزه کبله ملا قربان
یازلارسا ناف نسوان چوخالار نفوس ایران
وطنه اولار اولارین خدماتی بینهایت
فقط ای حاجی داداشلار چون ائدیر نظاره فالچی
کلم لطیف نافه کیریخیر بیچاره فالچی
قلمی وورار دواته چیخادار دوباره فالچی
طرفینه وار بو کارین زحماتی بینهایت
اولا گر سوادی یاران مشهدی تکذبانین
قاباغیندا عورت آچماز گوبگین فلان آغانین
او تکذبان محرم گوبگین یازاندا قانون
ائدر حفظ آبروی حضرات بینهایت

اشعار معجز شبستری

بير آزير ايستر آييلا ملت ايران الله
دستی يورغانی چکر باشينا ملان الله
ياتدی نادان، قويوب سجديه باشينی آخوند
ديدي: ای جسميمه جان، درديمه درمان الله
ياراديبسان منه يا رب نه حمل حيوانلار
مينمه سی، سورمه سی، يوک چاتماسی آسان الله
عقل ويررهم دييه وعد ائتدی بو بی عقله خدا
بيلميرم نولدی سورا اولدی پشيمان الله
دييسن ائتمه نظر عارض خوبانه طرف
نيه بس خلق اولونوب بو گوزل انسان الله
ياراديبسان علفی تا ايده خوراک حيوان
خلق ايديبسن گلی تا ايليه انسان الله
گلشن حسنی ایدیب خار شریعت غارت
گورنه پیس حاله قالیب سیب زنخدان الله
کاش سنده اوشییدین بیله مخلوق کیمی
تا بیلیدین نه چکیر قیش گونی عریان الله
دمیرم بو لوته بیر دست لباس ایله عطا
ایکی آرشین شیله ویر ایلیه تومان الله
ویرمیسن بو آجا اوتوز ایکی دیش مثل صدف
اولماسا دن نیه لازم دی دگیرمان الله
گورسه نیر دایره عصمتی بو عاجزه نین
گولمه ییم من نیجه ای خالق منان الله
کون حوایه باخیب گولدی تمام حوریلر
چون سویوندیردی اونی خازن رضوان الله
باغ رضواندان ئوتوردون اشیگه تومانچاق
کاش آدم یمییدی ایکی بوغدان الله
نه گنه صاحبیدی بو ایکی یاشیندا اوشاق
قارنی آج، پالتاری یوخ، آی سنه قوربان الله
بورکی یوخ، باشماغی یوخ، پیکری عریان بیکس
دولانیر کوچه و بازاری پریشان الله
سنی رزاق بیلیب اکدی بونی بیچاره کیشی
بیلمدی آخر آجندان ویره جک جان الله
ای ویرن بیر صلواته ایکی مین قصر طلا
ایوین آباد اولا ای صاحب احسان الله
او عمارتلری سات توک فقرانین جیبینه
ویر او پولدان منه ده بیر ایکی تومان الله
ایکی بوغدان ییب آدم ایکی مین ایل اول
هله ده ایلیری رسوای اونی قرآن الله
ایسته ییردی بیری مسجدده خدادن یورغان
گوردوم آغلار، دییه ر: ای قادر منان الله!
دیدیم آخماق کیشی گونده سنه بیر دانه لاواش
ویره بیلمز، نیجه ویرسین سنه یورغان الله
یا گرک قویمیاسان آدیوی رحمان رحیم
یا گرک ایلیه سن عدلیله دیوان الله
بالی خلق ایله میسن یوخسولی چاتداتماق ایچون
دوزدی بو سوز دیمیرم من سنه بهتان الله
اللی یاشیدی رحیمین یمه ییب بیر یول بال
ایلده یوز یول ییر اما حاجی رحمان الله