اشعار نصرت کسمنلی 11

اولان اولوب، كئچن كئچيب بلكه ده،
ايندي داها كؤورلمه يين يئري يوخ.
عؤمروم بويو بئله گليب منيم كي.
اوّليندن بيري واردي، بيري يوخ!
اوزاقدايدي من ايسته ين اوجاقلار،
اوره ييمدن گليب گئچدي سازاقلار،
آتالييدي،آنالييدي اوشاقلار،
بيزيم ائوده بيري واردي،بيري يوخ.
گؤزلريمه دولدورموشام ياغيشي،
بير كؤينكده چيخارميشام من قيشي.
شالوار-پئنجك گئيينردي تاي-توشوم،
منده ايسه بيري واردي، بيري يوخ.
اوزوم گولدو طلبه يم دئينده،
سيخيليرديم دوست پئنجه يي گئينده.
معلّمله ديل تاپا بيلمه ينده
قيمتمين بيري واردي، بيري يوخ.
قلبيم ياندي ايلك سئوگيمدن،عشقيمدن،
دارا دوشدوم،ال اومماديم هئچ كيمدن
مجلسلرده جان دئييب، جان ائشيدن
دوستلاريمدان بيري واردي، بيري يوخ.
من اوردويا نه لر گؤروب گئتميشديم،
اوره ك آليب، اوره ك قيريب گئتميشديم.
ايكي قيزا كؤنول وئريب گئتميشديم،
قاييداندا بيري واردي، بيري يوخ.
اوزاق گزدي عمي، دايي، بي بي لر،
سؤز آراسي منه "ائولن"دئديلر
نيشان اوچون ايكي شئي ايسته ديلر
منده ايسه بيري واردي، بيري يوخ.
واخت گله جك، بو گونو گؤره جك سن،
چوخ سوالا گؤزونو دؤيه جك سن.
واخت گله جك سن اؤزون دئيه جك سن
دئيه جك سن:«بيري واردي، بيري يوخ!»

 

اشعار نصرت کسمنلی 10

نه بيله يديم بو سئوگينين سوْنو يوْخ
نه بيله يديم دونيا بئله دؤنه جك.
نه بيله يديم سئوگي آدلي بو قوْناق
ايكيميزين آراميزدا اؤله جك ...
اولو سئوگي گؤيدن يئره ائندي مي
نه داياندي يوْلوموزون اوستونده؟
بو محبت سوْيودوقجا، سن دئمه،
جان وئريرميش قوْلوموزون اوستونده.
هر گؤروشه سورونوردو آياقلار
اوْل چمنلر – بير باهارليق چمني
دوْداقلاري يانديراندا دوْداقلار
اوره ييميز اوشويورموش، دئمه لي.
اَيلنجه لر قوْيمادي كي، گؤز آچاق
هر ايسته يي بيز بئله جه بيترديك
پاييز گلدي توْي – بايراملا، بيز آنجاق
يارپاق – يارپاق گونوموزو ايتيرديك.
شيرين اوْلدو يالانلارين زهه ري
حقيقتي گيزله ميشيك هميشه
سئوگيليلر اوْياق آچدي سحري
بيز آخشامي گؤزله ميشيك هميشه ...
يوخو گؤردوك ... گاه گوْرخولو، گاه دا شن،
بوْغدو بيزي ترددودلر آخاري
يوخولاردا اللر گؤردوك بيرلشن
ها يوْزدوقسا هيجران اوْلدو آخيري ...
نه بيله يديك بو سئوگينين سوْنو يوْخ
نه بيله يديك دونيا بئله دؤنه جك
نه بيله يديك سئوگي آدلي بو قوْناق
اوزوموزه باخا – باخا اؤله جك ...

اشعار نصرت کسمنلی 8

نه لر، نه لر يادا دوشدو
خاطيره لر اودا دوشدو
او گونلردن قلبيميزه
قورخولو بير صدا دوشدو
گؤرمه يه يديم كاش كي، سني
باهار گلدي قيش ائوينه
بو كؤچه ري قوش ائوينه
او واخت ناشي بنا كيمي
يادداشيمين داش ائوينه
هؤرمه يه يديم كاش كي، سني
كوله دؤنموش اود – اوجاقسان
بلكه بئله قالاجاقسان
اوندا اوشاق دئييلديم كي
بيليرديم كي سوْلاقسان
درمه يه يديم كاش كي، سني
هيجران گلدي سينه – سينه
گونلر اؤتدو سنه – سنه
بير گولداندا ساخلايا يديم
اؤز اليمه اؤزگه سينه
وئرمه يه يديم كاش كي، سني ...

اشعار نصرت کسمنلی 7

مژده لر له گله جك دير
ايللر سنين آجيغينا.
داها الوان آچاجاقدير
گوللر سنين آجيغينا.
غم ياغيشي ياغماياجاق ،
كدر مني بوغماياجاق ،
اينان كي آغارماياجاق ،
تئللر سنين آجيغينا.
آرزولاريم دينه جك دير ،
بخت اولدوزوم گوله جك دير ،
دنيزلره دؤنه جك دير ،
گؤللر سنين آجيغينا.
دئمه عشقيم سؤنه جك دير ،
گله جك بير گؤره جك دير ،
ائله مني سئوه جك دير ،
ائللر سنين آجيغينا ...!

اشعار نصرت کسمنلی 6

اونوتمادي گؤزلريني گؤزلريم ،
منيم گؤزوم ، سنين گؤزون دئييل كي .
او يئرلري ناخيشلايير ايزلريم ،
منيم ايزيم ، سنين ايزين دئييل كي .
يالانلارا اويرتمه ديم ديليمي ،
منيم ديليم ، سنين ديلين دئييل كي ،
هر يئته نه اوزاتماديم اليمي ،
منيم اليم ، سنين الين دئييل كي .
اوچوب گئتدين ، سازاق دوشدو كؤنلومه ،
منيم قلبيم ، سنين قلبيم دئييل كي ،
سن گولوش چون يارانيب سان ، اينله مه ،
منيم غميم ، سنين غمين دئييل كي .
سن قارالتدين ، من آغاتديم ساچيمي ،
منيم ساچيم ، سنين ساچين دئييل كي ،
ائشيدنلر باغيشلايير سوچومو ،
منيم سوچوم ، سنين سوچون دئييل كي .
يئره دوشدو اودلي سؤزوم كؤزه ردي ،
منيم سؤزوم ، سنين سؤزون دئييل كي ،
قارشيلاشديق ، ديل سوسدو ، اوز قيزاردي ،
منيم اوزوم ، سنين اوزون دئييل كي .
سن يولونو دييشديردين بير سحر ،
منيم يولون ، سنين يولون دئييل كي ،
بو هجرانا دؤزه جه يم بير تهر ،
دؤزه جه يم ، هجران اؤلوم دئييل كي ... !

اشعار نصرت کسمنلی 5

سني گؤروب آلدانان،
گؤزومه يازيغيم گلير .
كلمه باشي اوْدلانان،
سؤزومه يازيغيم گلير .
اوميدسيز يوْللاري يوْران،
يوْللارين صبريني قيران،
هر زامان سني آختاران،
ايزيمه يازيغيم گلير .
هر شئيي اونودوب گلن،
كده ريني اودوب گلن،
اوزونه اوز دوتوب گلن،
اوزومه يازيغيم گلير .
شاختا ووروب چوْوغون كسن،
يوْرغون دوشوب مندن كوسن،
سوْيوقلاردا تير – تير اَسن
ديزيمه يازيغيم گلير .
سوْروشما بو گيلئي نه دير،
خاطيره ن قلبيمي ديدير،
گوناه منيم اؤزومده دير،
اؤزومه يازيغيم گلير .

اشعار نصرت کسمنلی 4

من سني اونودا بيلميرم، آخي
اونوتسام نه لري اونودام گرک
گؤيلره باخميشيق آيلي گئجه ده
اونوتسام گؤيلري اونودام گرک!
دنيزي اونودوم، يا دالغالاري
خاطيرن ياديمدان چيخايدي باري
پاييزدا خزاني، قيشداسا قاري
باهاردا گوللري اونودام گرک!
دئ نئجه اونودوم من سني نئجه؟
سئوگي دورنا دئييل پاييزدا کؤچه
يوخوما گليرسن منيم هر گئجه
آيلاري، ايللري اونودام گرک!
سنين خياليندير حسرتله باخان
آديندير هر ساعات قارشيما چيخان
قاريشيب شکلينه گؤزومدن آخان
ياغيشي، سئللري اونودام گرک!
سينمده پشيمان اورگيم قالدي
اوچدون اللريمده لعلگيم قالدي
نه لري ايتيريب، باخ نييم قالدي
 نه لري، نه لري اونودام گرک!

اشعار نصرت کسمنلی 3

سن سیز ائله بیلمه اؤله جه یه م من
قارا بیر کدره دؤنه جه یه م من
گئجه لر یوخونا گله جه یه م من
سن منی اونودا بیلمه یه جک سن
عمرونده ناراحات ایزیم قالاجاق
آلووم سؤنسه ده کؤزوم قالاجاق
آرخانجا همیشه گؤزوم قالاجاق
سن منی اونودا بیلمه یه جک سن
سن ائله بیلمه کی غمدن اوزاقسان
عمرونو گونونو اودوزاجاقسان
اؤزونو بلکه ده اودوزاجاقسان
سن منی اونودا بیلمه یه جک سن
منی اونوتماغا عینادین کیمی
ایلک سئوگی آغریسی ، فریادین کیمی
لاپ اؤز آدین سوی آدین کیمی
سن منی اونودا بیلمه یه جک سن

اشعار نصرت کسمنلی 2

بوقاتار وصالدان حسرته گئدیر،
وطن اوره ییمد ن غربته گئدیر.
دئیه سن آیری بیر قیسمته گئدیر،
نه اولار،ساخلا یین  گئدن قاتاری.
گولوشوآپاریر،گؤزیاشیم قالیر،
اوره ییم بوشالیر،گؤزلریم دولور.
بو قاتارآیریلیق هاواسی چالیر،
نه اولار،ساخلایین گئدن قاتاری.
زامانی دوغراییب بیچیر بوقاتار،
سئوگیمین اوستوندن کئچیر بوقاتار.
منیم گؤز یاشیمی ایچیر بوقاتار،
نه اولار،ساخلایین گئدن قاتاری.
یویورسم،چاغیرسام چاتا بیلمه رم،
قلبیمدن قوپاریب،آتا بیلمه رم،
گئتدی می؟ بیر داها توتا بیلمه رم ،
نه اولار،ساخلایین گئدن قاتاری.
منیم باهاریمی آپاریب گئدیر،
الینی الیمدن قوپاریب گئدیر.
قویمایین یاریمی آپاریب گئدیر 
نه اولار،ساخلایین گئدن قاتاری.

اشعار نصرت کسمنلی 1

بوعشقین یاسینی ساخلایاجاغام ،
سن گئدن یوللارا باخمایاجاغام .
آغلاسام گیزلیجه آغلایاجاغام .
منیم گؤز یاشیمی گؤرمه یه جکسن.
طالع اویونلارا آتاجاق سنی،
فریادین گؤیلره چاتاجاق سنین.
گوناهین گؤزونو توتاجاق سنین،
منیم گؤز یاشیمی گؤرمه یه جکسن.
او گولن شکلینه باخیب آغلاسام،
گؤزومه بیرعینک تاخیب آغلاسام.
اوزومو اووجوما سیخیب آغلا سام،
منیم گؤز یاشیمی گؤرمه یه جکسن.
سن ائله بیلمه کی،غمدن اوزاقسان،
بیر یاغیش آلتیندا سؤنن اوجاق سان.
اوزومه باخماغا اوتاناجاقسان ،
منیم گؤز یاشیمی گؤرمه یه جکسن.