شعری از هوشنگ جعفری 4

یارین بویون قوجاقلادیم یار آغلادی من آغلادیم
ییغیشدی قونشولار بوتون جار آغلادی من آغلادیم
ایله کی اسدی بیر خزان سارالدی گولریم منیم
خبر چاتینجا بلبوله خار آغلادی من آغلادیم
او باشی قارلی داغلارا دانیشدیم آیریلیق سوزون
بیر آه چکیب باشینداکی قار آغلادی من آغلادیم
طاریم دا نار آغاشلاری منی گوروب دانیشدیلار
بویومی زیتون اوخشادی نار آغلادی من آغلادیم
اورک سوزون دیدیم تارا سیم لر اولدی پارا پارا
یاواش یاواش سیزیلادی تار آغلادی من آغلادیم
دیدیم که حق منیمکیدی باشیمی چکدیلر دارا
طناب کسنده بوینومی دار آغلادی من آغلادیم
جعفری ام بویوم بالا غم سینمده قالا قالا
یار جانیمی آلا آلا یار آغلادی من آغلادیم

گوروم ظولمون ائوی کوکدن تالانسین

گوروم ظولمون ائوی کوکدن تالانسین
 توکولسون لش لش اوستوندن قالانسین
  کوکوندن از قالیر داغ ییر غالانسین
 نه جینگیلتی سالیبسان شانلی بابک
 "سهند"یم تک باشی طوفانلی بابک
 سنی ازاده لر دیلدن سئوه ردی
 بوتون بابک دئییب دوشمان دویردی
 قولوندان اللی میلیون قول گویردی
  گوزون اچ اوز- گوزو ال قانلی بابک
 "سهند" یم تک باشی طوفانی بابک
 "دده قور قود" دئیه ر سازلار تئلینده
 "کور اوغلو"سسله نر چنلی بئلینده
  گلر بیر گون دیله تورکلر دیلینده
 دئیه ر هر یئرده هر ایرانلی بابک
  "سهند "یم تک باشی طوفانلی بابک
 سنین عشقینده بایراق لار اسیللر
 یتیبلر اوز کوکونده بو نسیل لر
 الاندا "معتصم "لر قول کسیللر
  سهندیم تک باشی طوفانلی بابک
 نه جینگیلتی سالیبسان شانلی بابک

شعری از هوشنگ جعفری 3

دوت اليمدن بوهمان الدي فراقينده  سنون
 ياديمه سالماق همان  باشه چالارديم گئجه لر
حسن رخساري روياده چکرديم قلمه
قلبيمي قاب ائليوب قابه سالارديم گئجه لر
بونا خاطر کي آدين  دوشميه  اغيار الينه
 دوز  کيمي آديوي  يازديقجا يالارديم گئجه لر
بئله سيزلاردي اوره ک  يادينا  سالديقجا  سني
 قوش  کيمي يئرده دوشرديم چاپالارديم گئجه لر
بلکه سن ساغ ياشييب ساغ دولانيب ساغ گزه سن
گوزه ليم  هر قادان  اولسايدي  آلارديم گئجه لر
سن   رقيبيمله  گونوز  سيره  چيخاردين  چمنه
 منده عشقينده سولارديم  سارالارديم گئجه لر
گوزلرين ياديمه دوشدوکجه  اسه ردي   بدنيم
 سينه مي  ديرناق   آتارديم پارالارديم گئجه لر
تابلو اوستونده چکرديم  سني  مين  زحمتيلن
بير باخيب اوستونه تئز رنگي جالارديم گئجه لر
ايندي ده گئتمه ليسن  گئت  دئموروم   من ده  گليم
قاللام اول  حالدا  کي  اولده  قالارديم گئجه لر
مکتب عشقيده مجنونئله من  باهم ايديم
غم ييغارديم سينمه  غصه  قالارديم گئجه لر
مجنون ئوز عشقينی ليلايه   گوره  بيلديردي
من  گونوز  يازديقيم عشقي قارالارديم گئجه لر

شعری از هوشنگ جعفری 2

فریاده گلین نازلی نیگاریم گیدیر الدن
همدم اولوب اغیاریله یاریم گئدیر الدن
رفتاری گوزه ل نطقی گوزه ل باخماسی گوئچک
آهو کیمی باخدیقجا قراریم گیدیر الدنحسرتله قالارگوزلریم اخر دالیسیجا
هئجران یلی اسدیکجه باهاریم گئدیر الدن
ناز ائله سه نازین چکرم ائول دیسه اوللم
یوخ چاره یولوم شعرو شعاریم گئدیر الدن
 آواره قالان من غم عشقینده یانان من
 اخر نه دیئم دارو نداریم گئدیر الدن
زولفون توکوب اطرافه گئیب رخت عروسی
اماده اولوب گئتمگه یاریم گئدیر الدن

شعری از هوشنگ جعفری

ساچلار قارالير حسن جمالين ايا بنزير
يانقاقلارينين قيرميزي سي المايا بنزير
عشقينده اوقدر آغلاميشام صبح اچيلينجاق
گوزياشلاريم اخديقحا اوزومدن چايا بنزير
گوزيولدا قولاق سسده قاليبدير گنه سن سيز
رنگيم سولوب آخرسارالان ارپايا بنزير
روحوم قوشو صحراي غمينده گئجه گونوز
تك ايريليب آواره گزن دورنايا بنزير
سين سيتمه مني تاب وتوانيم قوتاريبدي
زينگيلتي سسيم داي بوغولان هاي هايا بنزير
بايرامدا يتيشدي گنه ده عينيم آچيلمير
نه قيش قيشا.نه يازيازا.نه ياي يايابنزير

شعر قارا باغ هوشنگ جعفری

قاراباغ ائله بیل آنامدیر منیم
آنامین روحونو اوردا گورموشم
انامين ديلينه باغليدير جانيم
انا ديليم اولسه منده اولموشم
باخمايئن ائليمدن اراليام من
ديليم هاراليدي اوراليام من
سانمايئن ائللريم پرم پرمدي
تبريزيم اصليدي باكي كرمدي
اولكه لرشعريدي شاعر قلمدي
بابکین نبی نین مدالیام من
ديليم هاراليدي اوراليام من
بدنيم بولونوب اوره گيم آغرير
قوللاريم كسيليب بيله گيم اغرير
دوست ويريب خنجري كوره گيم آغرير
قیر قیزام.گورجویم .خوجالیام من
ديليم هاراليدي اوراليام من
بيرقيسيم اوره گم تيكه لنميشم
بير ائووج قان اولولوب سپه لن ميشم
جؤوشلانيب دنيز تك لپه لنميشم
اينديسه هاردايام اوراليام من
الان كي بوردايام بوراليام من

منظومه آغ آتیم هوشنگ جعفری

آغ آتیم ، قول قاناتیم
آت قدمین یورتمه یئری
آش تپه لردن
سیلدیریم تک سره لردن
سئله سینمیش دره لردن
بو نه طوفاندی گؤزل که لیگیمی
ایستیر آییرسین فره لردن
غیرتیم جوشه گلیر غملی خبردن
آغ آتیم – قورخما خطردن
*
آغ آتیم قول ، قاناتیم
شیهه چک ، قوی سسیوه
بلکه یاتانلاردا اؤیانسین
یاتماغین واختی دگیل دورسون اوتانسین
یاتانین عؤمرو تالانسین
تازا نعلین وار آتیم
چال بو داغین سینه سینه ، قوی پارالانسین
چال داغین سینه سی باتسین ، یارالانسین
داشی داشدان ، آرالانسین
*
آغ آتیم قول قاناتیم
داش قایادان آشما چتیندی
قاباق اؤز یوققوشادی ، قاشما چتیندی
داغا دیرماشما چتیندی
داشا ، سووخاشما چتیندی
باخما یوللاری چتیندی
اورانین هئیبتی یوخدور
آغ آتیم همت ائله
غیرتی یوخدور
هله اؤز یوققوشالار چوخدو قاباقدا
آشماق اولماز بو آیاقدا
*
آغ آتیم قول قاناتیم
بسدی ایاق ساخلاما ، گون باتدی قارالدی
گون گئچیب داغ دالینا رنگی سارالدی
داغین اوستون دومان آلدی
آغ آتیم ، بس بو نه حالدی؟
بورا یارقاندی آتیم دورما آماند.
*
آغ آتیم ، قول قاناتیم
آت قدم آیدینلیغا ساری
هؤرکوشن اوولاریلان
چیخ سره یاللاری یوخاری
قار قالان داغلارا سال بیر نفسین
قوی اریسین بوز کیمی چئگینینده کی قاری
سولاری آرخلارا سال بلکه سووارسین
قوری قالمیش اوبالاری
قوی بؤیوک گؤلده اؤزوشسونله
یاشیل باش سونالاری
آغ آتیم
جهد ائله باریسنی تاری
آغ آتیم ، قول قاناتیم
طبعیمین دریاسی جوشقوندو
یئل اسدیر لپه لنسین
قوی چالیم صخره لره دالغامی
دالغام سپه لنسین
قوی یاغیش تک قورویان
داغلارین اؤستونده اله نسین
هرزه اوتلاری آپارسین
لالا بیتسین
هامی گؤللر تزه لنسین
گؤلو بلبل یییه لنسین
*
آغ آتیم ، قول قاناتیم
آت قدمین قلعه ی بابکدن آشاق
قارا گونلن ساواشاق
آت گؤلوندن سس آتیب
بابکین حالین سوروشاق
یئنه طوفاندا جوشاق
دریالار تک قوووشاق
*
آغ آتیم ، قول قاناتیم
شیهه چک قوی سه سیوه
هاجرین ترکینه چکسین نبی گلسین
قوی کور اوغلو آتینی داغلارا سالسین
ائشیدیب شیهه نی گلسین
الده کسگین قیلیجیلا
بویاسین قانه کئچل حمزه نی گلسین
قوی کرم سازینی سالسین دؤشونه
چؤللره دؤشسون
های سه سی ائللره دؤشسون
دئگیلن غملی کرم ایستر اگر ، اصلینی گلسین
دشمنین بلکه کسه ک نسلینی ، گلسین
قوی بو داغلاردا بؤیوک هلهله دوشسون
داغلارا ولوله دؤشسون
*
آغ آتیم ، قول قاناتیم
منه بیر قالغی بابامدان ، بو ورن دیلدی
بونو چئگنیمه ساللام
قاراداغ باشینی آللام
اورا بیر ولوله ساللام
آغ آتیم دورما ، یوبانسان ، دالی قاللام
*
آغ آتیم ، قول قاناتیم
بیز اگر قلعه ی سیمرغ دان آشساق
بیزه آزدی
باخما یوللار ناتارازدی
باخما بو قارلی دماوند
بو قفقاز بو هرازدی
باخما داغدا هاوا دوتقوندو ، آیازدی
باخما بو قیشدی بو یازدی
آغ آتیم آت قدمین دریا ، دایازدی
دریانی گئچسن اگر شهرِ نیازدی
اوردا هر قان کی تؤکولدو یئره
آزادلیقی یازدی
بشر آزادلیغا بازدی
*
آغ آتیم ، قول قاناتیم
اوردا دولبرچین اوتو دؤرت پَر آچیبدی
اوردا دیلله نمگه دیل تازه شیرین دیللر آچیبدی
اوردا باغلاردا بوتون گ,ل لر آچیبدی
آغ آتیم
آت قدم آیدینلیغا ساری