اشعار استاد یالقیز 5

من ده بير بولبولودوم چوخ وارايدي گول هوسيم
گولون عشقينده چاتاردي منيم افلاكه سسيم
بس كي فرياد ائله ييب عشقيمي اظهار ائله ديم
ليك گوللرده وفا گؤرمه ديم، اؤلدو هوسيم
چيغيريب سالديم هاراي، داديما بلكه يئته لر
نه سسه سس وئرن اولدو، نه ده فرياد رسيم
ائله ديم بسكي فغان، خسته دوشركن يورغون
ايندي ده واردي هله، تنگه دوشوبدور نفسيم
او بوداقلارداكي آزاد، اوخويارديم گول اوچون
نه بيلئيديم اولاجاقدير منيم آخر قفسيم
بولبوله ناله دي قسمت، گوله گولمك، نه دئييم
بو نصيبه، بو پايا قسمته كيم اولدو قسيم
دولانارديم باشينا اؤز گولومون، تيتررديم
اسمه سين، راضي اولارديم يئل اسنده من اسيم
ييغيشيب سينه مه غملر قالانيب بير داغ اولوب
عؤمرومون آخيري بو غم شله سي بسدي، بسيم
دولدو پرونده عشقيم غم ايله باغلاندي
چوخ شكايت ائله ديم اولمادي بير دادرسيم
ايندي من سانكي قوشام كنج قفسده، سيخيليب
نه قاناد واردي اوچام، وار نه يووام كي تلسيم
مني ده بو قفسه سالديرانيم اولدو هوس
اودو فرياد ائدريم آي سنه لعنت هوسيم
يالقيزام، يوخدو اوره كدن گر اؤلم آغلايانيم
عالم عشقده تك جان وئره رم يوخدو كسيم

اشعار استاد یالقیز 4

حوسن باغيندا، گؤزوم سن كيمي تا بير گوله دوشدو
گؤز ساتاشجاق سنه بيلديم كي ايشيم موشگوله دوشدو
گول كيمي سنده باخيب گولمه ده بيلديم كي سنين ده
باخيشين من دلي – ديوانه كيمي بولبوله دوشدو
او زامان كي مني مجنون ائله ييب چؤللره سالدين
دلي – ديوانه ليگيم شهرده ديلدن ديله دوشدو
او قارا تئللري يئل هورمه ده آل – گول ياناغيندا
ائله بيل باغدا گؤزوم سوسن ايله سونبوله دوشدو
منه فرهاد كيمي داغ چاپماغي اي گول سن ايش ائتدين
اوندا كي عشقين ايشي سن كيمي شيرين ديله دوشدو
تازا ايستير دي كي كؤنلون قوشو بيردم توتا اونلا
اوچدو باغدان سونا بير قوش كيمي سوزدو، گؤله دوشدو
چون كي يالقيز گؤروب عقل اولدو پاك احساسلارا دوشمن
اودو ديوانه اولوب داغلارا قاچدي، چوله دوشدو

اشعار استاد یالقیز 3

 گونشيك عشق گؤيونده، دولانير آي داليميزجا
گول – چيچكلي او باهاريق كي گلير ياي داليميزجا
آنلايانلار بيزه آلقيش دئيه جك هر زامان اولسا
آنلامازلاردا يامان سؤيله يه جك آي داليميزجا
دلي اولساق دادي يوخ تك بيزه ديوانه دئسينلر
لذتي اوندادي كي خلق باسا هاي داليميزجا
آختاريب بيزلري ويرانه كؤنوللرده تاپار كن
مريد اولموش بيزه ملت سورونه داي داليميزجا
هي سؤيوشدور وئره جكلر داليميزجا گؤزو دارلار
گؤز آچيقلار دا سئوينج ايله سلام پاي داليميزجا
ايندي خلقين حالينا درد – اودونا واي دئييريك بيز
گلي بير گون ده كي ملت دئير اي واي داليميزجا
كيمسه سد باغلايا بيلمز بو آخينلار قاباغيندا
بيز او جوشقون دنيزيك داييم آخير چاي داليميزجا
نه قده ركي ديري ييك خلقه خئير يوخ ماليميزدان
جان كي چيخدي چيخيلير يوخسولا دا پاي داليميزجا
بيزلره صدري دويو چاتسادا، آنجاق كوپن ايله
نه دي معناسي پيلوو دملمه تاي – تاي داليميزجا
بيزكي ايتقين ياشاريق اؤلكه ده ميليونلار ايچينده
گؤزكي يومدوق، قورولار شانلي قورولتاي داليميزجا
يئنه ايران ياشاسين كي يولوموز دوشدو فرنگه
نه هئلو سؤيله ين اولدو نه ده باي - باي داليميزجا
بيز ياشاركن سازي سينديرديلا محو اولدو عاشيقلار
بيزكي گئتديك چالينار هر گئجه ناي- ناي داليميزجا
سن يو اوسونچويا باخ كي ائله يوخلاتدي بو خلقي
اويموش حالدا گؤروسن سؤيلورو لاي -لاي داليميزجا
بيزكي ماي بايرامي اوسته قارا زندانلارا دوشدوك
للا گيريان دولانير ايندي بير آي، ماي داليميزجا
آنالار دوغسالار هر عصرده بير اصل صنعت چي
دوغولار اؤلكه ده مينلرجه بيزه تاي داليميزجا
وطن اؤولادينا سيزدن سورا يالقيز اومودوم وار
قويمانسينلار بو امكلر اولونا ، ضاي داليميزجا

اشعار استاد یالقیز 2

داغلار باشيني آلدي دومان، باخ قارا، داغدا
دوشدو قارا بختيم قارا، قالدي قاراداغدا
اغياره دئيين پوسقودا گيزلي نه ياتيبسان
كهليك كيمي سانماكي باتيبسان قارا، داغدا
تولكو كيمي كؤل آلتينا گيرميش، ساري گؤزلر
اي كاش بو خبر چاتميش اولايدي، سارا داغدا
عشقين گوجو چاپديرمادادير فرهادا داغي
آردينجا گزير خان چوبانين دا سارا داغدا
داغلار او سكوت ايله گومان ائتمه دانيشماز
گؤزله دانيشيب سن ده قويارسان بارا، داغدا
بير سس سالاسان اوندا گؤررسن نه خبردي
مومكن دي كي داش ياغديرا، باشلار يارا داغدا
اوچ داغ چكيليب سينه سينه يالقيزين آنجاق
ساغ داغ آتا، سول داغ آنا، اوغلو آرا داغدا

اشعار استاد یالقیز 1

يئنه عشقين پري سي اينجي لري دوزدو تئله
يايليغين باشدان آچيب تئللريني وئردي يئله
بير قيامت قوپاريب عاشيقيني سالدي اودا
يانديريب ياخدي كول ائتدي كولونو توكدو سئله
قاشين اويناتدي نشان وئردي وصالين يولونو
وصل  جانان  آدينا  عاشيقينه  قوردو  تله
قوردوغو بو تله نين ده آديني قويدو فراق
هره ني بير جوره سالدي مني ده توتدو بئله
بير عؤمور وئردي يالان وعده، دايان بوردا گليم
اؤنودا هاردا، توتك دوز چالير اوردا قه جه له
قالدي يوللاردا گليب چيخمادي گؤزلر آسيلي
دورموشام  انتظاريندا  گودوروم  يار  گله
گؤزلريم يوللارا باخماقدان اينان لاپ قاراليب
او وفا سيز نيگاريمدان دا خبر يوخدو هله
سوردوم از بس كي سوسوز - ياغسيز حياتين ماشينين
قيزديريب قيرپاچ ائديب يول دا قاليب گل ايته له
بير خبر چاتدي كئچن گون هله دؤز، دؤزمليسن
يئددي آيليق كي ده گيلسن بئله ائتمه عجله
مني گؤرجك چيغيرير خلق : قاچين گلدي دلي
سنين  اوستونده  قويوبلار مني  ملت  متله
دئينه مجنونه كي چوللرده نه آزاد ياشادين
خوش سنين حالينا ديوانه ليگين دوشدو چؤله
بنده دوشدوم مني شهريمده دولانديريلا خلق
دوشدو بوينومدا كي زنجير هر آن الدن- اله
نرد عشقينده گؤزل من ده اودوزدوم واريمي
تيكميشم ايندي گؤزوم سن وئرن او بير شتله
گلمگي - گلمه مگي بللي ده گيل يالقيز عمي
وصل و هجراني  اونون  باغليدي بير تار تئله