اشعار اسماعیل جمیلی 5

باهار گولور بولاغ گولور گول گولور
گول گؤزه لیم گولر اوْلسون حیاتین
گول چیچیین گولوشویله عؤمور سوْر
خوْش گؤرویله سئوینجینی آل ساتین
***
سئوگیمیزین اسن سرین یئل ایله
آرزوموزون فیدانلاری گول آچیر
سئودامیزین سازدا هارای تئل ایله
داغ دالیندان اومود گونو نور ساچیر
***
قارا قیشدیر داملا داملا اریین
آیدین دورو بولاغلارا عشق اوْلسون
قارانلیقدیر اولدوز اولدوز چوروین
یانارسؤنمز چراغلارا عشق اولسون
***
یئرسیز یئره دیره نسه ده قارا قیش
آرزی یازی کؤنلوموزده یازلانیر
پوهره وئرن گول چیچکلی هر ناخیش
سازیمیزدا سؤزوموزده نازلانیر
***
اؤزگور یازین آرزیسیدیر یاشانیر
توتساق اسیر آنا وطن قوینوندا
بیزیم اولان گله جکدیر بویلانیر
گونش کیمی هر گئجه نین سونوندا
***
بیزیم یازدا یاللی گئدر دورنالار
قوجاق قوجاق چیچک آچار چمنده
آنا دیلده دوْداقلاردان بال دامار
آزاد ائلیم آزاد یاشار وطن ده

اشعار اسماعیل جمیلی 4

بیز واریق وارسا وطن وارایسه دوغما دیلیمیز
اؤیره نیب بیلمه لیدیراؤز دیلینی تورک ائلیمیز
آنا تک جاندان عزیزدیر آنا تورپاق آنا دیل
حورمتین ساخلا یاشارکن آنالار قدرینی بیل
وطنین کیملیییدیر وارلیغینین داش تملی
کیملییین بایراغیدیر هر بالانین دوغما دیلی
آنا دیلدیر بزه ین دویغولارین اویلاغینی
سوسله ین آرزیلاری سئوگی سئوینجین باغینی
بولبول اؤز دوغما دیلیله گوله سویلر سؤزونو
هر گول اؤز رایحه سیله تانیدار اؤز اؤزونو
آنا دیلدیر داشییان لایلالارین جان دادینی
آنا دیلدیر یاشادان ائولادینین اؤز آدینی
آنا دیلدیر ائلینین تاریخی آیدین تانیغی
یوردونون اؤلکه سینین آیناسی سؤنمز چراغی
آنا دیلده آنانین سئوگیسی عطری دادی وار
آنا دیلده وطنین شانلی شرفلی آدی وار

اشعار اسماعیل جمیلی 3

آنا دیلیم
ناخیش ناخیش اینجه ایپک بئشیگینده
کئچمیشیمی قوناقلایان
دویغولارین دنیزینده
اینجی ده یرلر کروانین آغیرلایان
دونیالاری دونیاسیندا  سیغیشدیران
آنا دیلیم
دونه دونه وقتسیز سولان چیچکلری
تاریخ بویو نیسگیل اولان دیلکلری
یاشام اوچون هپ چیرپینان اوره کلری
گوی قورشاغی قانادیندا اوچوشدوران
تورپاق یاشدا سایالارین گؤزگوسونده
مین ایللرین ایزلرینی
گونوموزله باریشدیران
آنا دیلیم
***
اؤز ائوینده چاغریلمامیش قوناق اولان
اؤز ائلینین دوداغیندا
اؤز یوردوندا یاساق اولان
شیرین دیللی وفاسیزلار دوزاغیندا
قولو باغلی دوستاق اولان
دیلیم دیلیم پارچالانان
سپه له نن
***
قارانلیغی دئشیب  یاران
اولدوز اولان
درین ظلمت گئجه لری
وورغونلارین حسرت دولو گؤزلرینده
آیدینلیغا اومودلانان
آنالارین سئوگی یایان نفسیله
لایلا لاردا یلماز اولان
بئشیکلرده گوللو چیچکلی یاز اولان
گاه ساز اولان گاه سؤز اولان
آنا دیلیم
***
دار گؤز یابان قوللوقچولار
کین کدورت مزاریندا
کیملیکلرین سومسوننده
قوجا شرقه حوکوم سورن
آدیم سانیم تاپداناندا
اوتانمازلار یوخلوغومو کوی سالاندا
وارلیغیمین کئشیگینده اویاق اولان
اؤز ائلینه داغلار کیمی دایاق اولان
اویانیشا چراغ اولان
دایانیشا بایراق اولان
آنا دیلیم   آنادیلیم

اشعار اسماعیل جمیلی 2

کعبه نین چاشدیق یولون میخانه ده ائتدیک مکان
مین یقیندن یاخشی دیر بو سهو یئی دیر بو زیان *
اعتقادین قیدین آتدیقدا چوروتدوک کندیرین
حکمت کوفریله حققین منظری اولدو عیان
سیندیریلماز بوزلاری چاتلاتدی شککین بالتاسی
سورغولار ییخدی حصاری چیخدی ایمان اورتادان
اسگی دفترلر کول اولدو  تندیرینده دورانین
دولت ظولمت داغیلدی  داغ دالیندان سوکدو دان
هر شئیی بیلمیش ، دئمیش سون سؤز اولان اویدورمانین
ایچ اوزو چیخدی اوزه  قوتساللیغا  دوشدو تالان
ایسه ده باش مینلر ایل بوش باشلیغیله بوشلوغا
حق سوراغین گویده یوخ یئرلرده آختاردی قانان
قوللوغوندان جان قوتاردیقدا موقددس اوهامین
عقل ایله علم اولدو انسان وارلیغین انسان قیلان
گیزلم ایچره گیزلی لر ظولماتینه توتدو ایشیق
بیلگی آیدینلیق گتیردی قارشیسی جهل ویالان
اؤزگور انسان یپ یئنی دونیالارین آچدی یولون
اسگی تانری اسگی لشدیکجه یئنیلشدی  زمان
دورمادان دؤنمکده دونیاده  دؤنوشدور دؤنمه ین
یوخلوغا محکوم دور ترپنمه ین دونموش قالان
دون دئییشمکله دئییشمز کوهنه کوفلو دویغولار
علم ایله چاغداش باخیش ،عقل ایله  یولچو اولمادان