اشعار تورکی نظامی گنجوی 6

ائدرسه عاشيقي جاهل مزمت
اونا قيمت وئرر عارفلر البت
جهاندا عشقده ن باشقا نه وارسا
كدر دير غصه دير درد دير نهايت
هر آغلار گؤزلويه عاشيق دئمزلر
اوزنده عاشيقين واردير علامت
باشين دان گئچمه ين عاشيق دئييلدير
جسارت ايستر عشقيده ن محبت
كيمين وار بير جهاندا بيله ياري
ايكي عالمده ايلر استراحت
اي عاشيق گئچ باشيندان يار يولوندا
داغيلسين قوي باشيندان درد محنت
* * *
سرخوشلوق ائده ن دؤلت، هوشيار اولاجاق بيرگون
ايللر جه ياتان بختين، بيدار اولاجاق بيرگون
قالماز بوقاپي باغلي وار هر گئجه نين صبحو
ديلبر بئله هيچ قالماز دلدار اولاجاق بيرگون
اغياريمي جانانيم اوخشارسا بوگؤن البت
بو سؤگيلي گؤزلرده اوخار اولاجاق بيرگون
من كافري عشق اولدوم بيلديم كي بو داستاندان
بوينومدا اونون زولفو زنار اولاجاق بيرگؤن
* * *
بيلمم نه تحفه من قول او سلطانه گؤنده ريم
لايق دئير كي، جانيمي جانانه گؤنده ريم
اي دوست ايسته ديم ائيله ييم بخش كونلومو
ائتديم حيا كي زيره ني كرمانه گؤنده ريم
اي خواجه مصلحت ائله الله رضاسينا
موره م نه تحفه سؤيله، سليمانه گؤنده ريم
يوخدور متاع ميز كي اولا ياره لايقي
درويش تكي بو حضرت سلطانه گؤنده ريم
يانميش سينمده يوخدور بيره ر آرپادانه سي
ويرانه دير بو كند اونا بس من نه گؤنده ريم
بايرام يئتيشيدي، خسته بو جانيم لا بير دئيين
بيلمه م نه قوربان اول شاه قوربانه گؤنده ريم
يوخدور نظامي ياخشي عمل سنده هيچ صبا
ياخشي عمل ده يي نه يين ميزانه گؤنده ريم؟
* * *
هرگئجه تدبير گؤرور كونلوم سنين هجرانينا
صبح تئزدن بند اولور عشقين شيرين سلطانينا
كونلومو وئرديم سند من سن كي بير جان اولموشوق
باشقا بير جان وارمي يئتسين باشقا بير جانانينا
گؤنلري بايرام كيمي شيرين گئچر باخسان گولوم
صبح تئزدن سن نظر سالسان اگر قوربانينا
وارمي جرعت، قالديريم شمشير سن تك آتلي يا
باشيم اوسته توتموشام وور ضربتي قالخانينا
مجليسينده من كيمي مهمان گره ك دائم سنين
گوهري توكسون اوزه قصد ائيله سين اوز جانينا
سن جيگر ائدمكدن الچك – آي پري ائت امتينا
يوخسا غرق ائيلر سني بيرگون جيگر اوز قانينا
گؤزلريمدن سئل كيمي توكدوم جيگر سويون بوگون
تا نظامينين غباري قونماسين ايوانينا

اشعار تورکی نظامی گنجوی 5

حسنون گؤزل آیت لری ای سئوگلی جانان
اولموش بوتون عالمده سنین شانینه شایان
گل ائیله عنایت منه وئر بوسه لبیندن
چونکی گؤزلین بوسه سیدیر عاشیقه احسان
سوردوم کی کؤنول هاردادی آلدیم بو جوابی
هئچ سورما تاپیلماز اونو آختارسادا انسان
رحم ائیله دئییب سیل کیمی گؤز یاشیمی تؤکدوم
گل قانیمله اَل یوما ای آفت دوران
انصافین اگر اولسا آچیق سؤیله «نظامی»
سنله نئجه رفتار ائلسین ای مهی تابان
گل سؤیله جوابین نه اولار سورغو زمانی
احوالیمی سندن سوروشارسا قیزیل اسلان

اشعار تورکی نظامی گنجوی 4

شمعی صوندور دخی پروانه کی یاریم گلدی
گوله باخ آغلا بولوت نازلی نگاریم گلدی
گئجه بایرام ائدرم جانیمی قربان سنه یار
سروریم، تاجی سریم، باغلی باهاریم گلدی
قامتین سرو سنین، جنتی گزدیم تایی یوخ
چاکری اولدوغوم اول شاهی سواریم گلدی
حسنونون شمعینه پروانه دئییب دؤندی کوله
آتشیم صؤندورن اول لاله عذاریم گلدی
دئدیم ای نازلی ملک سئو بو نظامینی دئدی:
سنینم عهد ائله دی چشم خماریم گلدی

اشعار تورکی نظامی گنجوی 3

آی اوزلو نگاریم كیمه مهمان اولاجاقسان
بیر سؤیله كیمین شانینه شایان اولاجاقسان
شاهلیق چتری وار باشین اوستونده بو آخشام
عنبر چترینله كیمه سلطان اولاجاقسان
شكر دئمیرم من سنه اوندان دا شیرین سن
دلبر نئجه بیر بختوره جان اولاجاقسان
ظلمت گئجه سن نورلی چیراغ ، پیس گوزه گلمه
ای آب حیات سن كیمه جانان اولاجاقسان
گئتدین نئجه بس تاب ائله سین هجره نظامی
او خسته ایكن ، سن كیمه درمان اولاجاقسان

اشعار تورکی نظامی گنجوی 2

منیم ای نازلی دلداریم ، منیم ای دردیمه درمان
منیم ای دولتیم ، واریم ، باغیشلا ، گئچ گناهیمدان
سالاندا سن منی بنده ، یاخینلیق اولماسا سنده
اگر قانیمی تؤكسنده ، یولومدان دؤنمرم بیر آن
شیریندیر لبلرین دلبر ، او گول رخسارینی گؤستر
یازیق كؤنلوم سنی ایستر ، منی الدن سالیر هجران
جمالین پرده یه سالما ، بو عاشیقدن اوزاق قالم
اگؤزومدن انتقام آلما ، منی قویما بئله حیران
بدخشان لعلی سنسن یار ، اوزون یاقوت كیمی پارلار
سنون حسنونده دیر گلزار ، جمالیندیر نگارستان
منیم چین لیلی ، عمر انسان ، و یا بلقیس و صنعانسان
یادا بیر ماه كنعانسان ، سنه اولسون جانیم قوربان
منی سنی مجنون ائتمیش سن ، حیاتدا محزون ائتمیش سن
اوزونه مفتون ائتمیش سن ، ائدیبسن قلبیمی بریان
دئییردیم من سنین یارین ؟ كی اولدوم ایندی بیمارین
سنین نورانی رخسارین ، منی یاندیردی ، ای جانان
نظامی اولدو بیچاره ، ائدیب هجرانین آواره
تاپیلمیر دردینه چاره ، اولوب جاری گؤزوندن قان

اشعار تورکی نظامی گنجوی