به! باهارین گنه گلدی یئلی‌‌نین همهمه‌سی،
قیش گئچیب گئتدی او قار و کولک و دمدمه‌سی.
اولدو بئیرام، آغاجلار گول آچیب، قوشلار اوخور،
هانی ساقی! او گول‌اوز آغزیما اولسون ممه‌سی؟
باش قویوب خلق بیابانا اوشاقدان بؤیوگه،
کیشی‌سی، عورتی، بیر یئرلی عبید و امه‌سی.
ای کی دونیانی اؤگرسن بگه‌نیبسن نه‌یینی؟
دی گؤروم یاخشیدیر آیا بو خرابین نمه‌سی؟
دؤولت و سلطنتی جاه و جلال و بزه‌گی،
نعمت و عزتی بیر آرپایا ده‌گمز همه‌سی.
هیده‌جی هاردا تماشا، هارا اول قارا گونون،
اونو چوخدان اله‌نیب میخدان آسیلدی کمه‌سی.
بو سولان گولشنی، غم دوشگونو، یانمیش جیگری،
صوبح و آخشام دوعاسیندا بودور زمزمه‌سی:
اهل تفریش ایا کاش کی سینسین قلمی،
خلق تبریز همیشه ایتی اولسون قمه‌سی