هئچ شمع‌له رام اولماز پروانه‌لروز بیزلر
زنجیره باش ائندیرمز دیوانه‌لروز بیزلر
دونیا ایله صورت‌ده وار اولفتیمیز آمما
معنی‌ده بو عالم‌دن بیگانه‌لروز بیزلر
سئیلاب-ی حوادث‌دن نئیلر بیزه گردون کیم
طوفان-ی کئشاکئش‌دن ویرانه‌لروز بیزلر
هرگیز سسوموز چیخماز هئچ‌کیم دیلوموز بیلمز
هرچند کی دیل‌لرده افسانه‌لروز بیزلر
یوخ طاعتوموز آمما فاریق دئییلوک قووسی
اول ماه بوت-ی چین‌دور، بوتخانه‌لروز بیزلر
شمس-ی روخوموز شمعه، البته وورار طعنه
دیوانه‌ لیباسیندا فرزانه‌لروز بیزلر
بیر داملا خیال ائتسک سیغماز یئدی دریایه
گیردابدا بسله‌نمیش دوردانه‌لروز بیزلر
سورسان نیه گزمیرسیز بس عقل مداریندا
چون دایره‌دن چیخمیش سئیرانه‌لروز بیزلر
بیگانه باخیش‌لاردا هم حاکم و هم محکوم
هم اؤز- اؤزوموزدن ده بیگانه‌لروز بیزلر
بوتخانه‌لری ویران ائتدیرمه‌دیمی دؤوران؟
بیز تک دخی هئچ گلمز دؤورانه‌لروز بیزلر