يانميشام هجران اوديلا بي وفا سن بيلمه دين
طعنه لر وئرميش رقيبيم ناروا سن بيلمه دين
عشق درسين اؤرگشندن مين بلالر چكميشم
دل بلا، دلبر بلا، عشقيم بلا، سن بيلمه دين
بي وفا ليقلار گؤرندن آشنادن كوسموشم
سن دئمه بيگانه لر ميش آشنا سن بيلمه دين
نئيله ييم عؤمروم توكندي غصه غمسيز اولماديم
همدميم كي درد اولوبدور مونس نوا سن بيلمه دين
گؤز ياشيم امداد ائدر هردن اونون مديونيم
خلوتيم چون ائيله يير چوخ با صفا سن بيلمه دين
او سببدندير اوپوب هر قطره سين من بوشلارام
اولمايا مندن اودا باري جدا سن بيلمه دين
روزگارين ساز ناسازين دئنن سرمد كئچيب
كوكله مه ك قصدينده يم بوندان صورا سن بيلمه دين