یاشار عالمده آسوده ولی آزاد اولان ملت
تاپار دونیا بویو عزت گر اولسا جان فشان ملت
حقوقون بیلمه یین انساندا روح اولماز ؛ حیات اولماز
قالار دائم قاپاز آلتیندا اولماز کامران ملت
آزادلیق روحونون الهامین آل سرو خوراماندان
آزادلیقدان اوجالدیب دیر سمایه باش عیان ملت
قلم آزاده ؛ دیل آزاده؛ سوز آزاد اگر اولسا
اولار گویلرده؛ دریالرده قطعا حکمران ملت
وطن پرور لیکین آثارینی تک لفظ ده بیلمه
گرگ وئرسین بو یوللاردا بویوک بیر امتحان ملت
ترقی ایسته ین بیر کشورین سرمایه سی جان دور
گرگ دیر کی نثار ائتسین بو یولدا باش و جان ملت
آزادلیق امتحانین وئردی آذربایجان اول
ولی آخر ازیلدی اهل آذربایجان ملت
جفا چکدی داغلیدی؛ وئردی مینلر قوچ؛ قوزو قوربان
اوزو بیر گولمه دی عومرونده بو بی خانمان ملت
اولنلر اولدو قورتاردی قالانلار اولدو بی چاره
بیری غربتده جان وئردی بیری زنداندا جان ملت
ائله بیر ظلملر باش وئردی استبداده مین رحمت
دئسم اولموش جنایتدن اولار بیر داستان ملت
یئنه بیر عده خائن قویمور آسوده نفس چکسین
سئویر بو گولشنین سولسون گولو اولسون خزان ملت
بونو بیلمک گرک زجر و شکنجه پایدار اولماز
مبارز شخص لر قورخماز اولومدن هئچ زامان ملت
اگر ظلمون توپو وار گولله سی وار قلعه سی وارسا
بیل حاقیندا بوکولمز قوللاری اولماز نهان ملت
گلر بیر گون طبیعت محو ائدر خائنلری جمعا
اولار ایران آذربایجان بیر گولوستان ملت
دونر بو شانلی یوردوم روضه ی رضوانه هر یئرده
عدالت پرچمینده بسط اولار امن و امان ملت
او گون من اولماسام بو خادمی سن گل او گون یاد ائت
مزاریمدا سعادت گونلرین ایله بیان ملت
حقیقت بیزده؛ قان بیزده؛ شجاعت بیزده؛ گوج بیزده
یازیلمیش طالعینده قهرمان ائل- قهرمان ملت
وطن شیرین دور فرهادی یم منده بو شیرینین
بو عشقیمدور کی اولموش هر زمان ورد زبان ملت .