آراز، هر یاز چمن بیردیر، او ساحلده، بو ساحلده
قرنفیل، یاسمن بیر دیر، او ساحلده، بو ساحلده
بیلیرسن کی، سویا خنجر، بیچاق وورسان دا آیریلماز
اوءرک بیردیر، بدن بیردیر، او ساحلده، بو ساحلده
ازلدن آیریلیق دردی، وصال دردی، وطن دردی
ایناندیم بیر ده من، بیردیر، او ساحلده، بو ساحلده
اوءرک تئل‏لی موقدّس ساز، شعیردن اینجه خوش بیر دیل
آراز بیلدین‏می سن بیردیر، او ساحلده، بو ساحلده؟
سلیمان، گل هارای سال، قوی بوءتون عالم ائشیتسین کی
عزیز، دوغما وطن بیردیر، او ساحلده، بو ساحلده