یئری گؤزل یئری سنه قارغارام
دونیا ایچره ایشین آه و زار اولسون
قارا عقرب اسلانبیان دیلیندن
سیاه زولفون دال گردنه مار اولسون
*
من قربانام یارین گؤزل خویونا
هوندور قامتینه ، اوجا بویونا
سنین سویون دؤنسوز سونسوز سویونا
گول آچماسین باغچانیزدا خار اولسون
*
گؤزللر ایچینده گریان اولاسان
یاناسان اودلارا بریان اولاسان
وفالی یارلارا قربان اولاسان
اونلارا باخاندا سنه عار اولسون
*
یادلارینان بیر ائیله دین سیررینی
قیامتده یاندیرارلار درینی
یاتان یئرده شاهمار وورسون ارینی
ناله سیندن قولاقلارین کار اولسون
*
گؤزل گؤروم سنین اوزون گولمه سین
تیغی غمزه باغرین باشین دلمه سین
قولاغینا اوشاق سسی گلمه سین
آللاهیمدان ایکی دیده ن کور اولسون
*
خسته قاسم دوست یولوندا قالاندا
ال اوزالدیب قول بوینونا سالاندا
کئفین دورولاندا ، کؤنلون اولاندا
بیزه گلن ایاقلارین وار اولسون