قاینار گؤزلریندن، شوخ باخیشیندان،
عجایب فیتنه‌لر، فعللر گؤرونور،
صف ـ صف دوران سیاه کیپریکلریندیر،
یوخسا کی گؤزومه میللر گؤرونور؟
آغزی پیاله‌سن، قددی میناسن،
نئیچون اوتورورسان مندن یانا سن؟
سن مگر کی یاشیل باشلی سوناسن،
سنده تر جیغالی تئللر گؤرونور!
گئده‌ن گئتمه، بیر بری باخ، آی گئده‌ن،
گؤزوم دویماز سن تک گؤزه‌ل کیمسه‌دن،
گاه یاخادان شعله وئریر آغ بدن،
گاه اولور کی، نازیک اللر گؤرونور.
قددین طعنه وورار او سروِ نازا،
جان قوربان ائیله‌رم سن تک شهبازا،
اوزون کیمی زولفون کیمی ترـ تازا،    
نه لاله‌لر، نه سونبوللر گؤرونور.
واقیف! یاد ائت سنی یاد ائیله‌یه‌نی،
من سئویرم منه یاریم دئیه‌نی،
قویماز گؤز اؤنوندن سئوه‌ن سئوه‌نی،
کؤنولدن کؤنوله یوللار گؤرونور.