زینبون اولدی خدایا گونی یلدا گئجه سی
گیدی بیر تازه گلین قاره محنا گئجه سی
تازه دامادی ائدوب قانه عدو غلطیده
طوی اطاقینده عروس اولدی قرا پوشیده
هربیر گوشه ده اندوه و غمه پیچیده
بیله صبحون کچه جک گور نجه آیا گئجه سی
آل پیغمبره تنگ ایلدیلر دنیانی
شمردن آلدیلا مهلت شب تاسوعانی
فاطمه قزلارینون اولدی بلند افغانی
دئدیلر اول گئجیه محشر کبری گئجه سی
قویمادی روم و فرنگه گئده ظل اللهی
تشنه اولدورمگه جمع اولدی رعیت شاهی
قالدی عباس پناهینده حسین واللهی
اهل بیتی اوزی سالم او محابا گئجه سی
یار و انصارینی شاه شهدا قیلدی خطاب
بو بیابانیده دریا کیمی موج ایلیه آب
ئولدوروللر منی عطشان بویوروب ختم مآب
کربلا واقعه سین سیر ایدوب اسرا گئجه سی
هره ئوز اوغلونی حسرتله چکوب آغوشه
صبح اولونجا گئجه نی گئتمه دیلر بیر هوشه
گلدی عباس یچون هر آنیده غیرت جوشه
که هاچان صبح اولو بو مهلت اعدا گئجه سی
اذن عام اولدی گئده ایسته سه هر کیم جانین
قانه لابد بویانار یا که توکلر قانین
وعده جانانه وئروب جان وئره جانانه حسین
بو گئجه دور که همین وعده نون عقبا گئجه سی
قویمادیلار یتوره حرفینی اتمامه امام
دسته دسته قویوب یوز قاچماقا اول فرقه خام
قیلدی مشعل لری خاموش شه ذوالاکرام
بختی تک اولدی قرا زینب علیا گئجه سی
خیمه لرده دوشوب اطفال حسین تشویشه
الده عریان قلج عباس گئدر گردیشه
سویلدی ائتمه سون هیچ کیم بو گئجه اندیشه
مگر عباسوز ئولوبدی اولا پروا گئجه سی
اعتقادیم بودی معراجه رسولینی خدا
آپاروب سری واریمش ائده سری نجوا
ایلیوب واقعه کرب و بلانی القا
بو گئجه دور که همان وعده نون اخری گئجه سی
یوخ امیدیم قسم اول جانوه سندن غیری
نولا قسمت اولا بیضایه جمالون سیری
قسمت اولماسا اونا ، قعر جهنم دی یری
وای اگر بو گئجه تک گئچسه او فردا گئجه سی